საქართველოს ვიცე პრემიერ- მინისტრი გიორგი ბარამიძე დიდი ბრიტანეთიდან აშშ-ში გაემგზავრა. როგორც "ჯი-ეიჩ-ენს" ბარამიძის აპარატიდან აცნობეს, ვიცე-პრემიერი შეხვედრებს ნიუ-იორკსა და ვაშინგტონში გამართავს, როგორც მთავრობის, კონგრესის, ასევე არასამთავრობო სექტორისა და აკადემიური წრეებიის წარმომადგენლებთან.
უფრო კონკრეტულად, ვიზიტის ფარგლებში გიორგი ბარამიძე სენატორ ჯონ მაკკეინს, კონგრესის საგარეო საქმეთა კომიტეტის თავმჯდომარეს, კონგრესმენ ჰოვარდ ბერმანს, NDI-ის პრეზიდენტ კენ ვოლაკს შეხვდება. ამასთან, დაგეგმილია შეხვედრა თავდაცვის მდივნის მოადგილე ალექსანდრ ვერშბოუსთან და რესპუბლიკელ კონგრესმენ ილეანა როს ლათინენთან, რომელიც ამერიკაში ჩატარებული არჩევნების შედეგების შემდეგ კონგრესის საგარეო საქმეთა კომიტეტის ახალი თავმჯდომარე ხდება.
ასევე, გიორგი ბარამიძე სიტყვით გამოვა გერმანიის მარშალის ფონდში. ასევე მონაწილეობას მიიღებს ჯონ ჰოფკინსის უნივერსიტეტისა და პოლონეთის ეკონომიკური ფორუმის ორგანიზებით გამართულ კონფერენციაში "ტრასატლანტიკური კონსესუსის მიღწევა რუსეთთან მიმართებაში" და შემაჯამებელ სესიაზე ევროატლანტიკურ უსაფრთხოებაზე და ამ მიმართულებით საქართველოს როლსა და პერსპექტივებზე ისაუბრებს.
შეხვედრებსა და გამოსვლებში გიორგი ბარამიძე ყურადღებას გაამახვილებს საქართველო- ამერიკის ორმხრივ ურთიერთობებზე, ოკუპირებულ ტერიტორიებზე ადამიანის უფლებების უხეშ დარღვევებზე, კულტურული მემკვიდრეობის ძეგლების ბარბაროსულად განადგურების ფაქტებზე, საქართველოს პრეზიდენტის მიერ სტრასბურგში გაჟღერებულ სამშვიდობო ინიციტივაზე, ქვეყანაში მიმდინარე წარმატებულ რეფორმებზე და საქართველოს ნატო-ში ინტეგრაციის პერსპექტივებზე, განსაკუთრებით ლისაბონის სამიტის შემდგომ.
დაგეგმილია საქართველოს ვიცე-პრემიერის შეხვედრები წამყვანი გამოცემების Wall Street Journal, New York Times, Forbes, Associated Press-ის ხელმძღვანელებთან და ჟურნალისტებთან.