ფინანსთა სამინისტროს ინფორმაციით, პრეზიდენტის მიერ გაცხადებული ახალი ეკონომიკური კურსი გულისხმობს ჯარიმების დარიცხვის ისეთი მექანიზმის შემოღებას, რომ ბიზნესის შეცდომის გამო დარიცხულმა თანხამ, საწარმოს გაჩერება და დანგრევა არ გამოიწვიოს, მაშინაც კი როცა საწარმოს მფლობელი შეგნებულად არღვევს კონკრეტულ ნორმას. პრეზიდენტის ეს განცხადება და საგადასახადო დავების განხილვის საბჭოს მიერ გადაწყვეტილების საჯარო გამოცხადება, დაეხმარება საგადასახადო ორგანოებს ახალი ეკონომიკური კურსის გატარებაში.
დავების განხილვის სამსახურის უფროსის დავით თომაძის განცხადებით, 6 დეკემბრის სხდომაზე საგადასახადო კანონმდებლობაში არსებული ბუნდოვანება მომჩივნის სასარგებლოდ განიმარტა. საბჭომ მიიჩნია, რომ საკანონმდებლო ჩანაწერი, რომელიც გამოიყენა საგადასახადო ორგანომ კონიაკის მწარმოებელი ერთ-ერთი კომპანიისთვის გადასახადების დასარიცხად მის მიერ უცხოეთში მიღებულ მომსახურებაზე, არ იყო საკმარისად ნათელი.
საბჭომ ასევე გააუქმა საგადასახადო ანგარიშ-ფაქტურაში დაშვებული მექანიკური შეცდომის გამო დარიცხული ჯარიმა. საბჭომ ჩათვალა, რომ საიდენტიფიკაციო ნომერში დაშვებული მცირე შეცდომა და მომჩივნის ხელმოწერის არარსებობა არ უნდა გამხდარიყო მეწარმის საქონლის აღურიცხავად მიჩნევის საფუძველი.
ფინანსთა სამინისტროსთან არსებული დავების განხილვის საბჭო განაგრძობს მიერ მიღებული გადაწყვეტილებების გამოქვეყნებას. გადაწყვეტილებების გამოქვეყნების მიზანია გადამხდელების დახმარება, რათა ისინი გაეცნონ ფინანსთა სამინისტროს სისტემის მიდგომებს და სწორად აწარმოონ თავიანთი საქმიანობა.
