დაავადებათა კონტროლის ეროვნულ ცენტრში საკადრო ცვლილებებია. ჯანდაცვის მინისტრის ბრძანებულების საფუძველზე უწყების ხელმძღვანელმა პაატა იმნაძემ და მოადგილეებმა თანამდებობები დატოვეს.
შრომის ჯანმრთელობისა და სოციალური დაცვის მინისტრმა ანდრია ურუშაძემ ცენტრის ახალი თავმჯდომარე და მოადგილეები უკვე წარადგინა.
როგორც ურუშაძემ დღეს გამართულ პრესკონფერენციაზე განაცხადა, იმნაძის ადგილს ნატა ავალიანი დაიკავებს, მისი მოადგილეები კი გიორგი კანდელაკი და მაია ბუწაშვილი იქნებიან.
"რეორგანიზაიცა მიზნად ისახავს ამ ორგანიზაციის როგორც მენეჯერული შესაძლებლობების გაზრდას, ისე ძირითადი პრობლემების განსაზღვრას... ამ ორგანიზაციის ახალ გუნდში იქნებიან წარმოდგენილნი ნატა ავალიანი (გამოცდილი სპეციალისტია. მას განათლება აშშ-ის უმაღლეს სასწავლებლებში აქვს მიღებული. თავისი საქმიანობა საზოგადოებრივი ჯანდაცვის სამსახურში მუშაობით დაიწყო. ბოლო წლემბამდე მუშაობდა არასამთავრობო ორგანიზაციის ხელმძღვანელად, რომლის მთავარი ამოცანა პროექტების დაგეგმა, მართვა და შეფასება იყო), გიორგი კანდელაკი (სერტიფიცირებული ექიმია აშშ-ში, ინფექციონისტი) და მაია ბუწაშვილი (მას სადოქტორო აქვს დაცული ნიუ იორკის უნივერსისტეტში. არის გამოცდილი სპეციალისტი და სამეცნიერო ხარისხის მფლობელი).
აღსანიშნავია, რომ გუნდში რჩება ცენტრის უკვე ყოფილი თავმჯდომარე პაატა იმნაძეც, რომელიც ურუშაძის განმარტებით, სამეცნიერო საბჭოს უხელმძღვანელებს.
"მნიშვნელოვნად მიგვაჩნია მემკვიდრეობითობის შენარჩუნება", - დასძინა მინისტრმა და აქვე იმედი გამოთქვა, რომ დაავადებათა კონტროლის ეროვნული ცენტრის ახალი გუნდი ქვეყნაში საზოგადოებრივი ჯანდაცვის წინაშე მდგარი ამოცანების გადაჭრას თავს წარმატებით გაართმევს.