24 მარტს, ბოლონიის საბავშვო წიგნის საერთაშორისო ბაზრობა დასრულდა, სადაც, „თბილისი - წიგნის მსოფლიო დედაქალაქის“ მიერ ორგანიზებულ სტენდზე, საქართველოში მოქმედი გამომცემლობების საბავშვო წიგნები იყო წარმოდგენილი. ასევე, გაიმართა შეხვედრები ილუსტრატორებთან და საბავშვო მწერლებთან.
23 მარტს, „თბილისი - წიგნის მსოფლიო დედაქალაქის“ დირექტორმა ნინია მაჭარაშვილმა და დირექტორის მოადგილე, ნინო კიკნაძემ, ჩაატარეს სპეციალური შეხვედრა, რომლის განმავლობაშიც პროექტის მიმდინარეობაზე, გამოწვევებსა და მიღებულ შედეგებზე ილაპარაკეს. ასევე, ისაუბრეს ბოლონიის საბავშვო წიგნის ბაზრობაზე წარმოდგენილ ქართულ პროგრამასა და ქართულენოვანი ავტორებით უცხოელი გამომცემლების მხრიდან დაინტერესებაზე.
ბოლონიის წიგნის ფესტივალის ტრადიციულ The Illustrators Survival Corner-ზე, ილუსტრატორებმა ანა ჯანელიძემ, ვარლამ ჯმუხაძემ და გიორგი ჯინჭარაძემ, დაინტერესებულ საზოგადოებას არა მხოლოდ საკუთარ ნამუშევრები წარუდგინეს, არამედ შეხვდნენ გამომცემლებსა და ლიტერატურის აგენტებს, რომლებსაც, სამომავლო თანამშრომლობის დაგეგმვის მიზნით, საკუთარ პორტფოლიო გააცნეს.
თბილისის ილუსტრაციის ფესტივალის მიერ ორგანიზებულ გამოფენაში საქართველოში მომუშავე ათი ილუსტრატორის ორმოცამდე ნამუშევრის პრინტი იყო წარმოდგენილი. ნამუშევრების გაყიდვიდან შემოსული თანხა, უკრაინის დახმარების ფონდში გადაირიცხება.
„თბილისი - წიგნის მსოფლიო დედაქალაქის“ საერთაშორისო პროექტების კოორდინატორმა, ლუკა გრიგოლიამ და ილუსტრატორებმა, თანამედროვე ქართული საბავშვო ლიტერატურის განვითარებაში არსებული ძვრებისა და სიახლეების თაობაზე ისაუბრეს, ხოლო გამომცემლობა „ზოლიანი კატის“ დამფუძნებელმა ნიკი თარხან-მოურავმა, საქართველოში მოქმედი პატარა გამომცემლობების წინაშე არსებული გამოწვევების შესახებ.
მწერალთა სახლმა, ბაზრობის სტუმრებს, საბავშვო ავტორი, ვასილ გულეური გააცნო, რომელმაც საკუთარ შემოქმედებასა და, ზოგადად, საბავშვო ლიტერატურის მნიშვნელობაზე ილაპარაკა.
„თბილისი - წიგნის მსოფლიო დედაქალაქის“ ფარგლებში, საბავშვო ლიტერატურის განვითარების მიმართულებით, არაერთი პროექტი განხორციელდა. მათ შორისაა თბილისის საბავშვო წიგნის ფესტივალის დაარსება, რომლის ფარგლებშიც ასევე დაწესდა საბავშვო ლიტერატურული პრემია „ნაკადული“.
„თბილისი - წიგნის მსოფლიო დედაქალაქი“ UNESCO-ს პროექტია, რომელიც ხორციელდება თბილისის მერიის ფინანსური მხარდაჭერით. პროექტის გენერალური სპონსორია საქართველოს ბანკი.
