აჭარის მთავრობა შიდა ტურიზმისა და რეგიონალური ტურიზმის ხვედრითი წილის ზრდას ელის, ამის შესახებ საუბარია აჭარის ძირითადი მონაცემებისა და მიმართულებების დოკუმენტში, რომელიც 2011-2014 წლებს მოიცავს.
"მსოფლიო ეკონომიკური კრიზისის პირობებში ტურისტული სეზონისათვის მზადება ახალი რისკებისა და გამოწვევების გადალახვას გულისხმობს. ექსპერტების შეფასებით ამ პირობებში მოსალოდნელია ძვირადღირებული ტურების ხვედრითი წილის შემცირება, მთელს მსოფლიოში ბიზნეს აქტივობის შესუსტებასთან ერთად მოსალოდნელია ასევე ბიზნეს ტურების შემცირებაც, ნაკლებად მიმზიდველი იქნება ტურისტებისთვის ისეთი ტურებიც, სადაც მაღალია მგზავრობის ხარჯების ხვედრითი წილი. ამ პირობებში მოსალოდნელია, რომ გაიზრდება შიდა ტურიზმისა და რეგიონალური ტურიზმის ხვედრითი წილი"- ნათქვამია დოკუმენტში.
აჭარის მთავრობის გათვლებით, უახლოეს წლებში მნიშვნელოვნად გაიზრდება კონკურენცია, როგორც საერთაშორისო, ისე შიდა ბაზარზე. ასეთ ფონზე კი ახალი და შედარებით იაფი ტურისტული პროდუქტების შექმნა, სერვისის დონისა და ინფრასტრუქტურის გაუმჯობესება და ადგილობრივი ტურისტული ინდუსტრიის სუბიექტებისათვის ხელშეწყობა და სტიმულირებაა საჭირო. მნიშვნელოვანია ასევე, მარკეტინგული სარეკლამო საქმიანობის კონცენტრირება შიდა და რეგიონალურ ბაზრებზე.
იმავდროულად დაფინანსდება მაღალმთიან აჭარაში სამთო სათხილამურო კურორტის მშენებლობის საპროექტო სამუშაოები, რაც იქნება მყარი საფუძველი შემდგომი საინვესტიციო მოქმედებების განსახორციელებლად და ინვესტორების მოსაზიდად.