ესტონეთს საქართველოსთან სავაჭრო ურთიერთობების გაღრმავება სურს.
ამის შესახებ ესტონეთის პრემიერ-მინისტრმა ანდრუს ანსიპმა საქართველოს საგარეო უწყების ხელმძღვანელ გრიგოლ ვაშაძესთან შეხვედრის დასრულების შემდეგ განაცხადა.
"არსებობს პოტენციალი იმისა, რომ საინვესტიციო ურთიერთობა უფრო გაღრმავდეს. ამ ეტაპზე ჩვენს შორის სავაჭრო ურთიერთობები დაბალ დონეზეა, თუმცა გაუმჯობესების შესაძლებლობა რომ არსებობს, ეს უდავოა", - განაცხადა ანსიპმა.
მისივე განმარტებით, საქართველოს ეკონომიკური განვითარებისთვის "ბევრი შესაძლებლობა აქვს".
შეგახსენებთ, რომ გრიგოლ ვაშაძისა და ანდრუს ანსიპის შეხვედრა საქართველოს საგარეო საქმეთა მინისტრის ესტონეთში ვიზიტის ფარგლებში განხორციელდა.