საქართველო საერთაშორისო კონფერენციას მასპინძლობს, რომელიც KFW Development Bank-ის და European Fund for Southeast Europe (EFSE) -ის მხარდაჭერით იმართება.
კონფერენციის თემაა "პასუხისმგებლობა ფინანსურ სექტორში".
ეროვნული ბანკის ინფორმაციით, კონფერენციის მიზანია ფინანსურ სექტორში პასუხისმგებლობის ზრდის ხელშეწყობა და სხვა ქვეყნების ცენტრალური ბანკების მიერ ამ თვალსაზრისით დაგეგმილი პროექტების გამოცდილების გაზიარება.
კონფერენცია დღეს ეროვნული ბანკის პრეზიდენტმა გიორგი ქადაგიძემ გახსნა.
"მომხმარებელთა უფლებების დაცვაზე ზრუნვა ეროვნული ბანკის ერთ-ერთი მთავარი პრიორიტეტია. ჩვენ შევიმუშავეთ კომპლექსური სამოქმედო გეგმა, რომელმაც მნიშვნელოვანი როლი უნდა შეასრულოს ფინანსური სექტორის პასუხისმგებლობის ზრდის პოპულარიზაციაში. ეკონომიკის განვითარების ტემპი დიდწილადაა დამოკიდებული ეკონომიკური სუბიექტების ფინანსურ გადაწყვეტილებებზე, რაც უფრო გამჭვირვალედ მიიღება ეს გადაწყვეტილებები, მით უფრო სტაბილურია ფინანსური სისტემა. ფინანსურმა ინსტიტუტებმა უნდა იზრუნონ კლიენტებისათვის უტყუარი და ზუსტი ინფორმაციის მიწოდებაზე, პროფესიულ რჩევაზე, ამავდროულად კლიენტებმაც ზედმიწევნით უნდა გააანალიზონ თავიანთი ქმედებების ფინანსური შედეგები და უფრო გონივრული გადაწყვეტილება მიიღონ" - განაცხადა გიორგი ქადაგიძემ.
ეროვნული ბანკის პრეზიდენტი აცხადებს, რომ მომხმარებლების უფლებების დაცვა განსაკუთრებით აქტუალური ეკონომიკური კრიზისის შემდეგ გახდა.
"ბოლო პერიოდში საქართველოს საბანკო სექტორი სწრაფი ტემპით ვითარდება. თუმცა ფაქტია, რომ განვითარების ამ ტემპებს ფინანსურ საკითხებში საზოგადოების ინფორმირებულობის დონე საგრძნობლად ჩამორჩება. ფინანსური სექტორის მიერ შეთავაზებული პროდუქტების სიმრავლე გარდაუვალს ხდის მომხმარებლის დაცვას, რადგან მომხმარებელს არ აქვს საჭირო ინფორმაცია, ფინანსური ფორმის დონესა და რესურსებზე, რომელიც საჭიროა სხვადასხვა პროდუქტების შედარებისთვის", - განაცხადა კონფერენციაზე გამოსვლისას გიორგი ქადაგიძემ.
"უნდა გაძლიერდეს საფინანსო ურთიერთობები ქვეყნებს შორის და უნდა შეიქმნას ძლიერი კორპორაციული მართვა, რაც ქვეყნებს დაეხმარება ურთიერთობების უკეთ დამყარებაში. სამომავლოდ მჭიდრო კავშირი გვექნება საქართველოსთან საფინანსო კუთხით" - განაცხადა European Fund for Southeast Europe (EFSE) -ის წარმომადგენელმა ელვირა ლეფტინგმა.
ეროვნული ბანკის ინფორმაციით, ასეთი ტიპის ღონისძიებები ყოველწლიურად ტარდება ევროპის სხვადასხვა ქვეყნებში ცენტრალური ბანკების დახმარებით. საქართველოში ჩატარებული კონფერენცია არის რიგით მეხუთე. პასუხისმგებლობა ფინანსურ სექტორში უზრუნველყოფს ამ სექტორში ჩაბმული ყველა მონაწილის კეთილდღეობასა და ინტერესების სამართლიანად დაბალანსებას. პასუხისმგებლობის ზრდა ფინანსურ სექტორში აძლიერებს ფინანსურ სისტემას, ზრდის მომხმარებლის რწმენას და სამრთლიანობის განცდას. სწორედ ამიტომ ქვეყნებმა უნდა შეიმუშავონ მომხმარებლის დაცვის მექანიზმები.
