საქართველოს ეკონომიკისა და მდგრადი განვითარების მინისტრი ვერა ქობალია სომალელი მეკობრეების ტყვეობაში მყოფი ქართველი მეზღვაურების გათავისუფლებაში დახმარებას გაეროსთან არსებულ საერთაშორისო საზღვაო ორგანიზაციას სთხოვს.
შესაბამისი თხოვნით ქობალიამ საერთაშორისო საზღვაო ორგანიზაციის ხელმძღვანელს, ლონდონში გამართულ პირისპირ შეხვედრაზე პირადად მიმართა.
"ჩვენ ვთხოვთ თანადგომას ამ ორგანიზაციას, რომ ეს საკითხი საერთაშორისო ტრიბუნებზე კიდევ ერთხელ წამოსწიოს და დაგვეხმაროს ქართველი მეზღვაურების სომალელი მეკობრეების ტყვეობიდან დახსნაში", - განუცხადა ქობალიამ ჟურნალისტებს.
აღსანიშნავია, რომ ლონდონში გამართულ შეხვედრაზე ვერა ქობალიამ საერთაშორისო საზღვაო ორგანიზაციის წარმომადგენლები საქართველოშიც მოიწვია.
წინასწარი ინფორმაციით, ორგანიზაციის დელეგაცია საქართველოს დეკემბერში ეწვევა და ქვეყნის საზღვაო სექტორში შექმნილ ვითარებას ადგილზე გაეცნობა.
შეგახსენებთ, რომ საქართველოს ეკონომიკის მინისტრი ლონდონს უკვე მესამე დღეა სტუმრობს.