ენერგეტიკის სამინისტროსა და თურქულ კომპანია KOLIN CONSTRUCTION-შორის მემორანდუმი გაფორმდა, რითაც თურქულმა მხარემ ოფიციალურად მიიღო უფლება მდინარე ტეხურაზე ჰიდროელექტრო სადგურების კასკადის მშენებლობა დაიწყოს.
როგორც ენერგეტიკის მინისტრმა ალექსანდრე ხეთაგურმა განაცხადა, მემორანდუმის გაფორმების შემდეგ თურქული კომპანია საპროექტო სამუშაოებს დაიწყებს, ხოლო ამის შემდეგ შეუდგება ჰესის მშნებელობას.
"აღნიშნული პროექტის განხორციელება მნიშვნელოვანია როგორც ქვეყნის, ასევე სამეგრელოს ეკონომიკური განვითარებისთვის. მდინარე ტეხურაზე ჰიდროელექტროსადგურების კასკადი აშენდება, რომელიც 107 მეგავატი სიმძლავრის იქნება. პროექტის განხორციელება მნიშვნელოვანია იმითაც, რომ ჰესის მშნებელობაზე და შემდეგ ექსპლუატაციისას სამეგრელოს მოსახლეობა დასაქმდება" - განაცხადა ალექსანდრე ხეთაგურმა. KOLIN CONSTRUCTION-ს ხელმძღვანელი ნაჯი ქოლოღლუს განცხადებით, თურქეთი საქართველოს ჰიდროელექტროპოტენციალის ათვისებით დაინტერესებულია.
"თურქეთი მაქსიმალურად არის დაინტერესებული საქართველოს ჰიდროელექტროპოტენციალი აითვისოს და ამიტომაც ჩვენ გადავწყვიტეთ მდინარე ტეხურაზე ჰესების კასკადი ავაშენოთ. ჰესის სიმძლავრე 110 მეგავატი იქნება, რომელიც წლიურად 550 მილიონ კილოვატ საათ ენერგიას გამოიმუშავებს. გამომუშავებეული ელექტროენერგიის ნაწილი მოხმარდება ქვეყნის ელექტრომომარაგებას, ხოლო ნაწილის ექსპორტი განხორციელდება თურქეთშიო" - განაცხადა KOLIN CONSTRUCTION-ს მმართველთა საბჭოს თავმჯდომარემ ნაჯი ქოლოღლუმ.
მისივე განმარტებით, შესაძლებელია თურქეთიდან ტეხურაზე აშენებული ჰესებიდან გამომუშავებული ელექტროენერგიის ექსპორტი შემდგომ ევროკავშირის ქვეყნებში განხორციელდეს.
