"2011 წლის სახელმწიფო ბიუჯეტთან დაკავშირებით ოპოზიციას თუ ექნება კონკრეტული წინადადები, მზად ვართ გავითვალისწინოთ", - ამის შესახებ ჟურნალისტებთან საუბრისას ფინანსთა მინისტრის პირველმა მოადგილემ პაპუნა პეტრიაშვილმა განაცხადა.
მისი თქმით, ბიუჯეტის საბოლოო რედაქციზე მუშაობა კიდევ მიმდინარეობს.
"ბიუჯეტის საბოლოო რედაქციაზე მუშაობა ჯერ კიდევ მიმდინარეობს და შემიძლია გითხრათ, რომ ბიუჯეტის 90% უკვე გაწერილია შესაბამის მუხლებში, გადასაწყვეტი რჩება ჯანდაცვის ნაწილი. ბიუჯეტის შესახებ დღეს კომიტეტებშიც ვიმსჯელებთ და თუ ოპოზიციას კონკრეტული წინადადები ექნება, მზად ვართ გავითვალისწინოთ", - აღნიშნა პეტრიაშვილმა.
დღეს 2011 წლის სახელმწიფო ბიუჯეტის პროექტი ევროპასთან ინტეგრაციისა და უცხოეთში მცხოვრებ თანამემამულეებთან ურთიერთობის კომიტეტებში და თავდაცვისა და უშიშროების კომიტეტში უკვე განიხილეს. შემდეგ პეტრიაშვილი სახელმწიფო ბიუჯეტს იურიდიულ საკითხთა და ადამიანის უფლებათა დაცვისა და სამოქალაქო ინტეგრაციის კომიტეტების, ასევე რეგიონული პოლიტიკის, თვითმმართველობისა და მაღალმთიანი რეგიონების კომიტეტის, აგრარულ საკითხთა, დარგობრივი ეკონომიკისა და ეკონომიკური პოლიტიკისა და გარემოს დაცვისა და ბუნებრივი რესურსების კომიტეტების გაერთიანებული სხდომაზე გააცნობს.
შეგახსნებთ, რომ 8 ნოემბერს ბიუროს სხდომაზე პარლამენტის თავმჯდომარემ დავით ბაქრაძემ კომიტეტის თავმჯდომარეებს მოუწოდა, 2011 წლის სახელმწიფო ბიუჯეტის პროექტის განხილვა დროულად დაიწყონ, რომ 15 ნოემბრამდე შენიშვნების დამუშავება და მთავრობისთვის უკან გაგზავნა მოესწროს.
