„საქართველოს ფოსტა" და ქართული ავიაკომპანია Georgian Airways-ი საქართველოში ავიაგადაზიდვების ბიზნესის განვითარების და ქართული პროდუქციის ექსპორტის ხელშეწყობის მიზნით, ერთობლივ კამპანიას  - „1 ლარი და 1 თეთრი" იწყებენ, რომლის ფარგლებში კომპანიებს საშუალება მიეცემათ საქართველოში წარმოებული პროდუქცია პირდაპირი ავიარეისებით, მსოფლიოს 17 ქვეყნის მიმართულებით გაიტანონ. ქართული ბიზნესის წახალისების მიზნით, ორი ეროვნული კომპანია თანხმდება ხელი შეუწყოს ქართული წარმოების იმპორტს, რაზეც კომპანიებს შორის ურთიერთთანამშრომლობის მემორანდუმი დღეს გაფორმდა.

პროექტის „1 ლარი და 1 თეთრი" ფარგლებში შემუშავებული იქნა სპეციალური საექსპორტო სატარიფო შეთავაზება, რომლის მეშვეობითაც კერძო სექტორის წარმომადგენლები შეძლებენ 1კგ. ტვირთის 1 ლარად და 1 თეთრად გაგზავნას. აღნიშნული ტარიფი მოიცავს სატერმინალო მომსახურების და ავიაგადაზიდვის საფასურს.

„საქართველოს ფოსტის“ ისტორიაში მნიშვნელოვანი დღეა. იგივე შემიძლია ვთქვა Georgian Airways-ის ხელმძღვანელობის სახელითაც. მემორანდუმი, რომელსაც დღეს მოეწერა ხელი ითვალისწინებს, სამომავლოდ მჭიდრო ურთიერთთანამშრომლობას დაგროვილ გამოცდილებაზე, რაც გამოიხატება სატერმინალო და საჰაერო გადაზიდვების მიმართულებით. დღეიდან ეს ორი ეროვნული კომპანია გააერთიანებს ძალებს იმისათვის, რომელი ხელი შეუწყოს ადგილობრივი პროდუქციის ექსპორტს მსოფლიოს სხვადასხვა მიმართულებით.

ჩვენ, ერთობლივად მოვამზადეთ პროექტი, რომელიც ყველაზე დაბალი ტარიფებით საქართველოში წარმოებული პროდუქციის საჰაერო გზით ტრანსპორტირებას გულისხმობს. სამომავლოდ დიდი მიზნები გვაქვს, რათა ადგილობრივ მეწარმეებს გაუმჯობესებული პროდუქტები შევთავაზოთ, რომელიც შესაბამისობაში იქნება ევროპული სტანდარტებით გათვალისწინებულ მოთხოვნებთან.

ეს არის დასაწყისი, რომელიც საბოლოოდ ქვეყანაში ლოჯისტიკური ბიზნესის განვითარებამდე მიგვიყვანს.

პროექტი „1 ლარი და 1 თეთრი" ერთი თვის განმავლობაში იქნება აქტიური და 5 აგვისტოდან 5 სექტემბრამდე მეწარმეებს საკუთარი პროდუქციის საჰაერო გზით ტრანსპორტირება ყველაზე დაბალი ტარიფებით შეეძლებათ“, აცხადებს „საქართველოს ფოსტის“ გენერალური დირექტორი ლევან ჩიკვაიძე..

როგორც ცნობილი, „საქართველოს ფოსტის" ტერმინალი  თბილისის საერთაშორისო აეროპორტის ტერიტორიაზე მდებარეობს. ტერმინალის საბაჟო სასაწყობე ობიექტები აღჭურვილია საჰაერო ხომალდის სახმელეთო-სატვირთო მომსახურებისთვის აუცილებელი თანამედროვე ტექნიკით. ტერმინალის 24 საათიანი სამუშაო რეჟიმი, უსაფრთხოების მაღალი სტანდარტები და აეროდრომზე დამოუკიდებელი გასასვლელი უზრუნველყოფს საჰაერო ტვირთების ეფექტურ და ხარისხიან მომსახურებას საერთაშორისო სტანდარტების შესაბამისად.

კომპანიაში დასაქმებული არიან მაღალი კვალიფიკაციის სერტიფიცირებული სპეციალისტები. 2018 წელს „საქართველოს ფოსტის" ტერმინალმა უზრუნველყო 2,5 მილიონ ტონაზე მეტი ტვირთის ექსპორტი.

თავის მხრივ, ავიაკომპანია Georgian Airways-ი აღჭურვილია თანამედროვე საშუალო დიაპაზონის თვითმფრინავებით, როგორებიცაა: Boeing 737, Embraer და CRJ. ავიაკომპანიის საქმიანობა ფოკუსირებულია მგზავრების და ტვირთის უსაფრთხო და საიმედო საჰაერო გადაყვანა-გადაზიდვაზე და მაღალი დონის მომსახურებაზე.

Georgian Airways-ი ყოველდღიურად საშუალოდ ანხორციელებს 10 რეისს და 7 500 ტონა ტვირთის გადაზიდვას, ხოლო თვის ჭრილში ახდენს 225 000 ტონა ტვირთის ექსპორტს.

Georgian Airways-ი კიდევ არაერთხელ შესთავაზებს ქართულ კომპანიებს ქართული პროდუქციის წარმოების მხარდაჭერას, არამარტო საჰაერო გადაზიდვების, არამედ ბიზნესის განვითარების კუთხითაც. Georgian Airways-ი როგორც ხიდი, აკავშირებს და მომავალშიც დააკავშირებს ქართულ მცირე და საშუალო ბიზნესის საერთაშორისო მომხმარებელთან" - განაცხადა ავიაკომპანია Georgian Airways-ის გენერალური დირექტორი, რომან ბოკერია.

სააგენტო  „აწარმოე საქართველოში“ მიიჩნევენ, რომ საქართველოს ფოსტისა და Georgian Airways-ის თანამშრომლობა ქართული პროდუქციის ექსპორტს გაზრდის.

„სააგენტო „აწარმოე საქართველოში“ აღნიშნულ ინიციატივას მიესალმება. მოგეხსენებათ ჩვენი სააგენტო ყოველდღიურ რეჟიმში თანამშრომლობს ქართველ ექსპორტიორებთან და მეწარმეებთან. შესაბამისად ჩვენთვის ცნობილია, რომ ლოჯისტიკურ ხარჯს მთლიან ხარჯში საკმაოდ დიდი წილი უჭირავს მთლიან იმ ხარჯში, რომელიც დაკავშირებულია ექსპორტის სრული ციკლის განხორციელებასთან. შესაბამისად დაბალი ტარიფები, რომელსაც საქართველოს ფოსტა და Georgian Airways-ი მეწარმეებს სთავაზობენ იმუშავებს როგორც დამატებითი სტიმული და მოტივატორი ექსპორტის წახალისების მიმართულებით“, აცხადებს სააგენტოს „აწარმოე საქართველოში“ ექსპორტის მენეჯერი ქეთი ქებუაძე.