ჩვენ გვქონდა ძალიან საინტერესო შეხვედრა, რომელზეც განვიხილეთ საქართველოსა და ამერიკის შეერთებული შტატების სტრატეგიული პარტნიორობის ყველა ძირითადი მიმართულება, ასევე ვისაუბრეთ იმ გლობალურ და რეგიონალურ გამოწვევებზე, რომელთან გამკლავებაც საქართველოს უხდება, - განაცხადა საგარეო საქმეთა მინისტრმა დავით ზალკალიანმა, საქართველოში ვიზიტით მყოფი ეროვნული უსაფრთხოების საკითხებში აშშ-ს პრეზიდენტის მრჩეველთან, ჯონ ბოლტონთან შეხვედრის დასრულებისას.
მინისტრის განცხადებით, უსაფრთოხების თვალსაზრისით არსებულ გამოწვევებზე საუბრისას, ყურადღება გამახვილდა საქართველოს ოკუპირებულ ტერიტორიებზე შექმნილ ვითარებაზე. დავით ზალკალიანმა აღნიშნა, რომ ამ მიმართულებით ჩვენ გვაქვს სტრატეგიული პარტნიორის მხრიდან ძალიან მკაფიო მხარდაჭერა და საკითხი მუდმივად დგას აშშ-ის პოლიტიკის დღის წესრიგში.
„ჩვენთვის ძალიან მნიშვნელოვანია აშშ-ის მხარდაჭერა, შეხვედრის ფარგლებში ვისაუბრეთ თუ როგორ შეიძლება ამ სიტუაციიდან გამოსვლა, ყურადღება გავამახვილეთ იმ სამშვიდობო ინიციატივებზე რომელიც საქართველოს გააჩნია. ასევე ვისაუბრეთ საერთაშორისო თანამეგობრობის მეტ ჩართულობაზე", - აღნიშნა საგარეო უწყების ხელმძღვანელმა.
მინისტრის განცხადებით, ჯონ ბოლტონთან შეხვედრაზე საუბარი შეეხო ეკონომიკური თანამშრომლობის გაღრმავების პერსპექტივებს. აღნიშნა, ამერიკელი პარტნიორების მხრიდან სრული მხარდაჭერა, მათ შორის თავისუფალი ვაჭრობის შეთანხმების მიღწევის თვალსაზრისით.
დავით ზალკალიანის განცახდებით, შეხვედრაზე ასევე ყურადღება გამახვილდა საქართველოსა და აშშ-ის შორის პოლიტიკური, სამხედრო და უსაფრთოხების სფეროებში მჭიდრო თანამშრომლობაზე. მან აღნიშნა, რომ წარმატებით სრულდება მემორანდუმი, რომელიც თავდაცვის და უსაფრთოხების სფეროში გვაქვს. ასევე განაცხადა, რომ ევროატლანტიკური ინტეგრაციის მიმართულებით ჩვენ გვაქვს აშშ-ის სრული მხარდაჭერა, რომელიც ნატო-ში ერთ-ერთი მთავარი მონაწილეა.
შეხვედრის შეფასებისას, დავით ზალკალიანმა ასევე განაცხადა, რომ ძალიან მაღლი შეფასება მიეცა საქართველოს კონტრიბუციას ავღანეთში მიმდინარე ოპერაციაში, სადაც საქართველოს მთავარ სტრატეგიულ პარტნიორთან, აშშ-სთან ერთად მნიშვნელოვანი როლი შეაქვს გლობალური უსაფრთოხების და გამოწვევების წინააღმდეგ ბრძოლაში.
