„აგროჰაბმა“ კომპანია „GEO-Group“-ის მიერ წარმოებული სუნელები რეალიზაციიდან ამოიღო. აღნიშნულის შესახებ „ჯი-ეიჩ-ენთან“ საუბრისას „აგროჰაბის“ მარკეტინგული კომუნიკაციების მენეჯერმა სალომე გველესიანმა განაცხადა.
როგორც გველესიანი განმარტავს, ქსელიდან „GEO-Group“-ის მიერ წარმოებული სუნელები საქართველოში აშშ-ს საელჩოს მიერ გაკეთებული განცხადების შემდეგ ამოიღეს, სადაც აღნიშნული იყო, რომ ჩატარებული ლაბორატორიული კვლევის შედეგად პროდუქციაში ტყვიის მაღალი დონე დაფიქსირდა.
„თვეების წინ ჩვენგან ჩვენს სარეალიზაციო დახლზე განთავსებული სუნელების სინჯი მართლაც აიღეს, რისი მიზეზიც იყო ის, რომ აშშ-ს მოქალაქეების დიდი ნაწილი „აგროჰაბის“ კლიენტია.
მას შემდეგ რაც აშშ-ს საელჩოსგან აღნიშნული წერილი მივიღეთ, „GEO-Group“-ის წარმოებული სუნელები დახლიდან ავიღეთ.
მინდა გითხრათ, რომ „GEO-Group“-ი არის უმსხვილესი მომწოდებელი და მისი სუნელები იყიდება ქვეყნის მასშტაბით 7 ათასზე მეტ მაღაზიაში და მათ შორის მსხვილ ქსელებში.
მათ როდესაც პროდუქცია სარეალიზაციო ქსელში შემოაქვთ ყველა დოკუმენტაცია წესრიგში აქვთ, წინააღმდეგ შემთხევაში ჩვენ მათ პროდუქციას სარეალიზაციო ქსელში ვერ გავუშვებთ“, აცხადებს „აგროჰაბის“ მარკეტინგული კომუნიკაციების მენეჯერი სალომე გველესიანი.
როგორც ცნობილია აშშ-ის საელჩომ საქართველოში მცხოვრები ამერიკის მოქალაქეებს გააფრთხილა, რომ საქართველოში წარმოებულ სანელებლებში აღმოჩენილია ტყვიის მაღალი შემცველობა.
„აშშ-ის საელჩოს მიერ ახლახან ჩატარებული ლაბორატორიული კვლევის შედეგად დადგინდა, რომ ადგილობრივი წარმოების სანელებლების ორ სინჯში (ხმელი სუნელი და ყვითელი ყვავილი) ტყვიის შემცველობა მნიშვნელოვნად აღემატება ჯანმრთელობის მსოფლიო ორგანიზაციის მიერ დაშვებულ მაჩვენებლებს. ორივე პროდუქტი წარმოებულია „GEO-Group“-ის მიერ და ნაყიდია „აგროჰაბში“, - წერია აშშ-ის საელჩოს მიერ საქართველოში მცხოვრები ამერიკის მოქალაქეებისთვის 25 ოქტომბერს გაგზავნილ მიმართვაში.
ტექსტში ასევე ვკითხულობთ, რომ საქართველოს სურსათის ეროვნული სააგენტოს მიერ წელს ჩატარებული კვლევის მიხედვით, რკინის მაღალი შემცველობა აღმოჩნდა დაფქულ წითელ წიწაკაში, რომელიც ასევე წარმოებულია „GEO-Group“-ის მიერ და ნაყიდია ახალციხეში მოქმედ სავაჭრო ობიექტში.
