ივანიშვილსაც კი რამდენჯერმე მოუწია იმის აღიარება, რომ ქართული ოცნების ბევრი მხარდამჭერი ხმას არ აძლევს სალომე ზურაბიშვილს, - ამის შესახებ "ევროპული საქართველოს" პრეზიდენტობის კანდიდატმა დავით ბაქრაძემ "ქართული ოცნების" თავმჯდომარის, ბიძინა ივანიშვილის გუშინდელ ინტერვიუსთან დაკავშირებით განაცხადა.
მისი თქმით, სალომე ზურაბიშვილის პოზიციაზე აგვისტოს ომთან და რუსეთთან დაკავშირებით, ამ პოზიციაზე ივანიშვილის მხარდაჭერა აჩვენებს, რომ ქართული სახელმწიფოს მომავლისთვის 28 ოქტომბრის არჩევნებზე წერტილი უნდა დაესვას ივანიშვილის ხელისუფლებას.
"ოცნების ბევრი მხარდამჭერი ხმას არ აძლევს სალომე ზურაბიშვილს და მადლობა მინდა ვუთხრა თითოეულ ასეთ ადამიანს, ვისთვისაც ქართული სახელმწიფო და ჩვენი მომავალი უფრო წინ დგას, ვიდრე პარტია და პარტიული ინტერესი", - განაცხადა დავით ბაქრაძემ.
