სამუშაო ვიზიტის ფარგლებში, გერმანიის ფედერაციულ რესპუბლიკაში გარემოს დაცვისა და სოფლის მეურნეობის მინისტრის მოადგილეეები გიორგი ხანიშვილი და სოლომონ პავლიაშვილი გარემოს დაცვის, ბუნების კონსერვაციისა და ბირთვული უსაფრთხოების ფედერალური სამინისტროს წარმომადგენელს იურგენ კაინჰორსტს შეხვდნენ.
ვიზიტის მიზანს დაცული ტერიტორიების მართვის საკითხები, და ამ მიმართულებით არსებული გამოცდილებისა და ცოდნის გაზიარება წარმოადგენდა. ასევე, შეხვედრის მონაწილეებმა გარემოსდაცვითი განათლების მიმართულებით არსებული გამოწვევები და ურთიერთთანამშრომლობის პერსპექტივები განიხილეს.
ვიზიტის ფარგლებში განხილულ იქნა საქართველოში ბიოსფერული რეზერვატის შექმნის პოტენციალი და შესაძლებლობა. 2015 წელს მიხაილ ზუკოვის ბუნების დაცვის ფონდის და ქართულ არასამთავრობო ორგანიზაციის კვლევის შედეგად ბიოსფერული რეზერვატის შექმნისთვის შეირჩა კახეთის რეგიონი. შეხვედრაზე განიხილეს ბიოსფერული რეზერვატის შექმნის სამართლებრივი საფუძვლები, რომელიც ბიომრავალფეროვნების ახალ კანონში იქნება გაწერილი.
ასევე საქართველოს დელეგაციამ მიღწეული შედეგების გათვალისწინებით და კვლევებზე დაყრდნობით, იმსჯელა საქართველოში უახლოეს მომავალში პირველი UNESCO-ს ბიოსფერული რეზერვატის დაარსებისთვის საბოლოო პროცედურების დაწყებისა და კახეთში ბიოსფერული რეზერვატის დაარსებისთვის ფინანსური მხარდაჭერის გაგრძელების შესაძლებლობაზე. აღნიშნულ შეხვედრაზე ყურადღება გამახვილდა კოლხეთის ტყეებისა და ჭარბტენიანი ტერიტორიების მსოფლიო ბუნებრივი მემკვიდრეობის (UNESCO) უბნად გამოცხადების მნიშვნელობაზეც. აღსანიშნავია, რომ გერმანიის მთავრობის ფინანსური მხარდაჭერით საქართველოში, გარემოსდაცვითი მიმართულებით, 10 პროექტი მიმდინარეობს.
