მთავარი პროკურორის თანამდებობის დასაკავებლად კანდიდატები იუსტიციის მინისტრმა უნდა შეარჩიოს ირაკლი შოთაძის გადადგომის შემდეგ მთავარი პროკურორის მოვალეობას ავტომატურად მისი მოადგილე შეასრულებს მანამდე, ვიდრე პარლამენტი შერჩეულ კანდიდატს კენჭისყრით არ დაამტკიცებს.
კანონმდებლობით განსაზღვრულია, რომ მთავარი პროკურორის თანამდებობის დასაკავებლად იუსტიტციის მინისტრმა უნდა დაიწყოს კონსულტაციები აკადემიურ წრეებთან, სამოქალაქო საზოგადოების წევრებთან და სამართლის დარგის სპეციალისტებთან. აღნიშნული კონსულტაციები 1 თვის განმავლობაში მიმდინარეობს. ამ კონსულტაციების შედეგად იუსტიციის მინისტრი შეარჩევს და საპროკურორო საბჭოს დასამტკიცებლად წარუდგენს მთავარი პროკურორობის არანაკლებ 3 კანდიდატს, რომელთა ერთი მესამედი მაინც განსხვავებული სქესის უნდა იყოს.
ამასთან, მთავარი პროკურორობის კანდიდატების შესახებ წარდგინება უნდა დასაბუთდეს. წარდგენის შემდეგ საპროკურორი საბჭო ყველა კანდიდატს ცალ-ცალკე განიხილავს და ცალ-ცალკე უყრის კენჭს. კენჭისყრა ფარულია.
დამტკიცებულად ჩაითვლება ის კანდიდატი, რომელიც მიიღებს მეტ ხმას, მაგრამ არანაკლებ საპროკურორო საბჭოს სრული შემადგენლობის ორი მესამედისა. საპროკურორო საბჭოს მიერ დამტკიცებულ მთავარი პროკურორის კანდიდატურას იუსტიციის მინისტრი თანხმობის მისაღებად დაუყოვნებლივ წარუდგენს საქართველოს მთავრობას.
საქართველოს მთავრობა 2 კვირის ვადაში თანხმობას აცხადებს ან უარს ამბობს მთავარი პროკურორის კანდიდატურაზე. მთავრობის თანხმობის შემთხვევაში, აღნიშნული კანდიდატურა დაუყოვნებლივ წარედგინება საქართველოს პარლამენტს.
პარლამენტში იმართება კანდიდატის განხილვა და მტკიცდება კენჭისყრით, დასამტკიცებლად კი სრული შემადგენლობის უმრავლესობა, ანუ 76 ხმა არის საჭირო. უარის შემთხვევაში ნებისმიერ საფეხურზე პროცედურა თავიდან იწყება და გაწერილია კანონმდებლობით.
