ჩემს მიერ იქნა დაყენებული კომპრომისული ვარიანტი, რომ 2020 წელს ჩეხეთი იყოს თავმჯდომარე ქვეყანა და იქ გაიმართოს კონგრესი, ხოლო 2023 წელს - მოლდოვაში, - ამის შეასხებ საქართველოს საკონსტიტუციო სასამართლოს თავმჯდომარემ ზაზა თავაძემ ბათუმში მიმდინარე საერთაშორისო კონფერენციის შემაჯამებელი სესიის დასრულების შემდეგ განაცხადა.
მისი თქმით, 34 ქვეყნის საკონსტიტუციო სასამართლოს წარმომადგენლების კომპრომისული გადაწყვეტილების თანახმად, ევროპის საკონსტირუციო სასამართლოების კონგრესი 2020 წელს ჩეხეთში ჩატარდება, ხოლო 2023 წელს - მოლდოვაში.
"დისკუსია იყო საკმაოდ ცხარე, იყვნენ როგორც ჩეხეთის მხარდამჭერები, ასევე - მოლდოვის. მოლდოვის მხარდამჭერები თავიანთ პოზიციას ხსნიდნენ იმით, რომ ეს არის ე.წ. ახალგაზრდა დემოკრატია და, შესაბამისად, იგი წახალისებული უნდა ყოფილიყო თავმჯდომარეობით. რაც შეეხება ჩეხეთს, ამ ქვეყნის თავმჯდომარეობის ერთ-ერთი მთავარი არგუმენტი იყო ის, რომ 2020 წელს ჩეხეთს საკონსტიტუციო სასამართლოს არსებობის 100 წლის იუბილე შეუსრულდება და როგორც ერთ-ერთი ყველაზე ძველი საონსტიტუციო სასამართლოს მქონე ქვეყანა ის ყოფილიყო კონგრესის მასპინძელი 2020 წელს.
ხმების შესაბამის რაოდენობას ვერც ჩეხეთი და ვერც მოლდოვა ვერ აგროვებდა. ჩემს მიერ იქნა დაყენებული კომპრომისული ვარიანტი, რომ 2020 წელს ჩეხეთი იყოს თავმჯდომარე ქვეყანა და იქ გაიმართოს კონგრესი, ხოლო 2023 წელს - მოლდოვაში. აღნიშნულ შეთავაზებას მხარი ერთხმად დაუჭირეს", - განაცხადა ზაზა თავაძემ.
ცნობისთვის, მანამდე 3 წლით ეს სტატუსი საქართველოს ჰქონდა.
შეგახსენებთ, ბათუმი ევროპის საკონსტიტუციო სასამართლოების მე-17 კონგრესს მასპინძლობს. სამდღიანი კონფერენციის სამუშაო დღის წესრიგი დღეს დაიხურა, ხვალ კი კონფერენციის მონაწილეებისთვის კულტურული ტურია დაგეგმილი.
