ელისო კილაძის შვილის დავით ხარშილაძის ბრალდების საქმეზე 4 პოლიციელი დაიკითხა, რომლებსაც ხარშილაძე მისთვის ნარკოტიკების ჩადებაში ადანაშაულებს.
არსებული ინფორმაციით, დაიკითხა კრიმინალური პოლიციის ნარკოტიკებთან ბრძოლის მთავარი სამმართველოს უფროსი რამაზ თარაშვილი და ამავე სამმართველოს თანამშრომლები არჩილ ოქრუაშვილი, ზაზა ჯახველაძე და მიხეილ ჩივიაშვილი.
პოლიციელებმა დაკითხვისას აღნიშნეს, რომ მათ ხარშილაძის დაკავებაში მონაწილეობა არ მიუღიათ და ისინი შემთხვევის ადგილზე პერიმეტრს იცავდნენ. ამასთან, პოლიციელებმა დავით ხარშილაძისთვის ნარკოტიკების ჩადება უარყვეს.
მიხეილ ჩივიაშვილმა უარყო დავით ხარშილაძის მიერ სასამართლოზე გაჟღერებული ინფორმაცია, რომლის თანახმადაც ჩივიაშვილმა, სამმართველოს ეზოში, პოლიციის შენობასთან შეკრებილი ბრალდებულის ახლობლების მიმართ, ხარშილაძის გასაგონად შეურაცხმყოფელი ფრაზები გამოიყენა და ამით სცადა ბრალდებულის პროვოცირება, რათა მას პოლიციისთვის ფიზიკური შეურაცხყოფა მიეყენებინა. თუმცა, მოწმის დაკითხვის შემდეგ დაცვის მხარემ სახალხო დამცველის წარმომადგენლის დაკითხვა იშუამდგომლა, რომელიც ადვოკატების მტკიცებით აღნიშნულ ფაქტს შეესწრო და დაადასტურებს, რონ ხარშილაძის პროვოცირების მცდელობას ადგილი ნამდვილად ჰქონდა.
შეგახსენებთ, მომდევნო სასამართლო პროცესი 4 ივლისს განახლდება, სადაც პოლიციელი ალექსი კობერიძე, დავით ხარშილაძის დაკავების მოწმე და სახალხო დამცელის წარმომადგენელი დაიკითხებიან.
