ადამიანის უფლებების სწავლებისა და მონიტორინგის ცენტი (EMC) დემურ სტურუას საქმეზე გამოტანილ გადაწყვეტილებას და „ბირჟა მაფიას“ საქმეს ეხმაურება.
როგორც განცხადებაში წერია, როგორც სტურუას, ისე დაკავებული ახალგაზრდების საქმე ერთობლიობაში კიდევ ერთხელ მიუთითებს ქვეყანაში მართლმსაჯულებისა და სამართალდამცავი ორგანოების მუშაობაში სისტემური პრობლემების და თვითნებობის არსებობაზე, რაც უკიდურესად მძიმედ აისახება მოქალაქეთა უფლებების დაცვასა და მათ უსაფრთხოებზე.
"ვეხმაურებით ქუთაისის საქალაქო სასამართლოს გამაოგნებელ გადაწყვეტილებას დემურ სტურუას თვითმკვლელობამდე მიყვანასა და უფლებამოსილების გადამეტებაში ბრალდებული ყოფილი პოლიციის თანამშრომლის გოდერძი თევზაძის გამართლებასთან მიმართებით.
ჩვენი მხრიდან სტურუას საქმეში არსებული მტკიცებულებების დეტალური შესწავლის პირობებში გაუგებარია, რომ სასამართლომ ვერ დაინახა სამტრედიის პოლიციის თანამშრომლის მიერ უფლებამოსილების გადამეტების ფაქტიც კი. საქმის მტკიცებულებები პირდაპირ მიუთითებდა, რომ პოლიციელმა სამსახურებრივი უფლებამოსილების განხორციელების დროს ყოველგვარი საფუძვლის გარეშე ჩაისვა დემურ სტურუა სამსახურებრივ მანქანაში და წაიყვანა ის იანეთის ტყის მიმდებარე ტერიტორიაზე. აღნიშნული დადასტურებულია საქმეში არსებული ვიდეოკამერების ჩანაწერებით და სატელეფონო ანძების მონაცემებით. საქმეში არსებული მტკიცებულებებით ასევე დადგენილია სტურუას მიერ თვითმკვლელობამდე დატოვებული წერილის ავთენტურობა და მის სხეულზე არსებული დაზიანებების ფაქტი, სტურუას გარდაცვალების დღეს არაერთი სატელეფონო ზარის განხორციელება პოლიციელის მხრიდან.
ამ და საქმეში არსებული სხვა მტკიცებულებების ფონზე ქუთაისის საქალაქო სასამართლოს დღევანდელი გადაწყვეტილება პოლიციელის ყველა ბრალდებაში გამართლებასთან მიმართებით სანდოობას აცლის ამ საქმეში მართლმსაჯულების ობიექტურად განხორციელებას.
ამ საქმის ფონზე მიშა მგალობლიშვილის და გიორგი ქებურიას საეჭვო გარემოებებში დაკავება და მათთვის პატიმრობის შეფარდება მიანიშნებს ორმაგი სტანდარტის არსებობაზე. ამ ახალგაზრდების დაკავება განხორციელდა მათი მხრიდან მუსიკალური კლიპით პოლიციის გაშარჟების შემდეგ. როგორც ცნობილია, ამ კლიპის გავრცელების შემდგომ მათთან განხორციელდა კომუნიკაცია, რომ კლიპი წაშლილიყო, რაზეც უარის მიღების შემდგომ მოხდა მათი დაკავება განსაკუთრებით დიდი ოდენობით ნარკოტიკული საშუალების შეძენისა და შენახვისთვის. ბრალდებულებს თავდაპირველად პოლიციის განყოფილებაში ხელი მოაწერინეს დაკავების ოქმზე იმ პირობით, რომ აღიარების შემთხვევაში ისინი გათავისუფლდებოდნენ 200-ლარიანი ჯარიმით. ბრალდებულ მგალობლიშვილის განცხადებით, მას პოლიციელის მითითებით ოქმში ასახა, რომ აღმოჩენილი ნარკოტიკული საშუალება მან ქუჩაში იპოვა, რაც კიდევ უფრო საეჭვოს ხდის ამ პირების წინააღმდეგ წარდგენილი ბრალდების რეალურობას", - ნათქვამია განცხადებაში.
ცნობისთვის, დემურ სტურუას გარდაცვალების საქმეზე ბრალდებული ყოფილი პოლიციელი გოდერძი თევზაძე ქუთაისის საქალაქო სასამართლომ გაამართლა.
ასევე, საქალაქო სასამართლომ „ბირჟა მაფიას“ წევრებს წინასწარი პატიმრობა შეუფარდა.
