ქობულეთში ორი წლის წინ დამწვარი სასტუმრო „არმაზის“ გარდაცვლილი მეპატრონის ოჯახის წევრები მოსამართლე დავით მამისეიშვილს მიკერძოებულობაში ადანაშაულებენ.
როგორც საზოგადოებრივი მაუწყებელი წერს, სასტუმროს მეპატრონეები საქმის დასრულებას და გამოძიების ბოლომდე მიყვანას ითხოვენ. მათ ეჭვი აქვთ, რომ პროკურატურა საქმის შეწყვეტას მოითხოვს.
"მამისეიშვილმა პირველ პროცესზე ჩემს შვილს უთხრა - ვიცი, რომ მართალი კაცი ხარ, მაგრამ უნდა დაგიჭირო, დავალება მაქვსო. ამხელა ხანძარი ვინ გააჩინა? რატომ იყვნენ ის ბავშვები უპატრონოდ ჩაკეტილი, რატომ არავის მოსთხოვეს პასუხი, რატომ დატოვეს ბავშვები უპატრონოდ", - განაცხადა გარდაცვლილი ზაზა ართმელაძის დედამ, თალიკო ართმელაძემ.
ცნობისთვის, ბათუმის საქალაქო სასამართლოში სასტუმრო "არმაზის" საქმესთან დაკავშირებული სასამართლო პროცესი 15 ივნისისთვის გადაიდო.
სისხლის სამართლის საქმეზე არსებითი განხილვის მორიგი პროცესი დღეს გაიმართა. პროცესზე მოწმეები დაიკითხნენ. მხარეებმა ხანძრის გამომწვევ მიზეზებზე ისაუბრეს.
ადვოკატ პაატა შავაძის თქმით, სასტუმროს მეპატრონის ზაზა (ჯემალ) ართმელაძის მიმართ აღკვეთი ღონისძიება შეფარდებული არ უნდა ყოფილიყო.
„მოწმემ დაადასტურა, რომ ზაზა ართმელაძე თავიდანვე მზაობას გამოთქვამდა, რომ დადგენილიყო სიმართლე. პროკურატურა ამბობს, რომ საქმეში ბრალი გარდაცვლილი ზაზა ართმელაძეს მიუძღვის. გარდაცვალების მიუხედავად ,პროცედურულად საქმე გაგრძელდება. ოჯახის ინტერესია, რომ გაგრძელდეს საქმის განხილვა იმიტომ, რომ დადგინდეს ჭეშმარიტება",- განაცხადა ადვოკატმა პაატა შავაძემ.
ორი წლის წინ, ქობულეთში მდებარე სასტუმრო „არმაზში“ გაჩენილ ხანძარს 3 ბავშვი ემსხვერპლა. დაღუპულები რუსთავის ცეკვის ერთ-ერთი ანსამბლის წევრები იყვნენ.
სასტუმრო „არმაზის“ მეპატრონე ზაზა (ჯემალ) ართმელაძე 29 მაისს გარდაცვლილი იპოვეს.
