ძალიან ბევრი ადამიანი, რომელიც ამ სფეროშია, ღიად საუბრობს, რომ სწორედ ვანო ზარდიაშვილია საკონტაქტო პირი საკანონმდებლო ხელისუფლებას და სასამართლო ხელისუფლებას შორის, - ამის შესახებ საია-ს თავმჯდომარე ანა ნაცვლიშვილმა არასამთავრობო ორგანიზაციების წარმომადგენლებს შორის შეხვედრის დასრულების შემდეგ ჟურნალისტებს განუცხადა.
მისი თქმით, დღევანდელ პრეზენტაციაზე წარმოდგენილი იყო, თუ როგორ ხორციელდება არაჯანსაღი კონტაქტი ხელისუფლების სხვა შტოებსა და სასამართლო ხელისუფლებას შორის.
"დღეს წარმოდგენილი იყო პრეზენტაცია, რომელიც ძალიან ღიად სახელებისა და გვარების მითითებით აჩვენებდა, როგორ იმართება სასამართლო სისტემა, ნაჩვენები იყო არა მხოლოდ სასამართლო სისტემის შიგნით გავლენიანი ჯგუფები, არამედ როგორ ხორციელდება არაჯანსაღი, არასათანადო კონტაქტი ხელისუფლების სხვა შტოებსა და სასამართლო ხელისუფლებას შორის.
ერთ-ერთი პირი, რომელიც პრეზენტაციისას იყო დასახელებული, არის ვანო ზარდიაშვილი. მიმოხილული იყო მისი მოკლე „ბეგრაუნდი“. ძალიან ბევრი ადამიანი, რომელიც ამ სფეროშია, ღიად საუბრობს, რომ სწორედ ვანო ზარდიაშვილია საკონტაქტო პირი საკანონმდებლო ხელისუფლებას და სასამართლო ხელისუფლებას შორის”, - განაცხადა ანა ნაცვლიშვილმა.
