სამარცხვინოა ის, რომ ჩვენ ვერ დავიცავით აზერბაიჯანელი ჟურნალისტი იმ საფრთხისგან, რომელსაც ის თავისი ქვეყნიდან გამოექცა საქართველოში, - ამის შესახებ „თავისუფალი დემოკრატების“ გენერალურმა მდივნმა თამარ კეკენაძემ აზერბაიჯანელი ჟურნალისტის, აფგან მუხთარლის გაუჩინარების საქმეზე საუბრისას განაცხადა.
მისი თქმით, ეს არის სირცხვილი, რომელსაც საქართველოს სახელმწიფო კიდევ დიდ ხანს ვერ მოიშორებს, რადგან ადამიანი, რომელიც იბრძოდა სამართლის მიღწევისთვის და ადამიანის უფლებებისთვის ჩვენ უბრალოდ გავწირეთ.
"ბოლო დღეების განმავლობაში ვისმენთ მინიმუმ უპასუხისმგებლო განცხადებებს ხელისუფლების მხრიდან. გასაგებია, რომ მძიმე მდგომარეობაში იმყოფებიან, რადგან ერთი მხრივ უნდა აღიარონ, რომ თავად იყვნენ ამ დანაშაულის მონაწილე და ხელი შეუწყეს ადამიანის აღმოჩენას აზერბაიჯანის ციხეში. მეორე მხრივ, თუ ქართველი სპეც და უსაფრთხოების სამსახურები არ იყვნენ ჩართულნი ამ საქმეში და უცებ ჩვენს ტერიტორიულ სივრცეში უცხო ძალებმა მოახერხეს ადამიანის გაქრობა, ეს ნიშნავს იმის აღიარებას, რომ სახელმწიფო არ გვაქვს და ჩვენ ვერ ვახერხებთ ვერც უცხოელი და ვერც ქართველი მოქალაქეეების დაცვას.
ხელისუფლებს მხრიდან დასახელებული ნებისმიერი ვერსია არის ცუდი და გაუმართლებელი. ეს არის სირცხვილი, რომელსაც საქართველოს სახელმწიფო კიდევ დიდ ხანს ვერ მოიშორებს, რადგან ადამიანი, რომელიც იბრძოდა სამართლის მიღწევისთვის და ადამიანის უფლებებისთვის ჩვენ უბრალოდ გავწირეთ.
აფგან მუხთარლი არ იყო ტურისტად ჩამოსული და იმყოფებოდა საქართველოში იძულებით. მას ემუქრებოდა საფრთხე, რომლითაც ხელი ეშლებოდა არა მარტო მის საქმიანობას, არამედ ეს იყო ფიზიკური განადგურების საფრთხე. მან ჩათვალა, რომ საქართველო არის ის ქვეყანა, სადაც იცავენ ადამიანის უფლებებს. ჩათვალა, რომ მას ექნებოდა მშვიდად ცხოვრების და საქმიანობის უფლება. ამ დროს ვხედავთ რეალობას, როდესაც თბილისში, დღისით, მზისით ადამიანი ქრება და ჩვენ ვხედავთ , რომ ეს ადამიანი ჩვენვე ჩავუგდეთ ხელში და გადავეცით იმ სახელმწიფოს, რომელსაც თავად გაურბოდა. აქ მკაფიოდ უნდა გავმიჯნოთ, რომ მნიშვნელოვანია, სტრატეგიული ურთიერთობა ჩვენს მეზობლებთან, აზერბაიჯანთან, რომელთანაც ხანგრძლივი და კარგი ურთიერთობა გვაქვს, თუმცა ყოველივე არ ნიშნავს იმას, რომ ადამიანის უფლებების დარღვევის ხარჯზე უნდა ხდებოდეს ამ თანამშრომლობის განვითარება.
სრულიად აბსურდია ჯეჯელავას განცხადება იმასთან დაკავშირებით, რომ ჟურნალისტმა უკანონოდ გადაკვეთა საზღვარი და თავისი გადაწყვეტილებით წავიდა იმ ტერიტორიაზე, სადაც ელოდებოდა ციხე. სრულიად შეურაცხადი უნდა იყოს ადამიანი, რომ საკუთარი თავი ჩააგდოს ასეთი საფრთხის ქვეშ. ჩვენთვის ორივე ვერსია მიუღებელია", - აღნიშნა მან.
