დადებითად შევაფასებ ლადო ჭანტურიას და სოფო ჯაფარიძის კანდიდატურებს ევროპის ადამიანის უფლებათა სასამართლოში - ამის შესახებ ადვოკატთა ასოციაციის ხელმძღვანელმა ზაზა ხატიაშვილმა მთავრობის მიერ ადამიანის უფლებათა ევროპულ სასამართლოში საქართველოდან წარსადგენი 3 მოსამართლის საკითხზე საუბრისას განაცხადა.
მისი თქმით, ის ფაქტი, რომ შოთა გეწაძეა წარდგენილი - სირცხვილია.
"დადებითად შევაფასებ ლადო ჭანტურიას და სოფო ჯაფარიძის კანდიდატურებს ევროპის ადამიანის უფლებათა სასამართლოში. ისინი კომისიის წინაშე კვალიფიციურად წარდგნენ და მიმაჩნია, რომ მათ აქვთ მაღალი ზნეობრივი და მორალური კრიტერიუმები. ის ფაქტი, რომ შოთა გეწაძეა წარდგენილი - სირცხვილია. სწორედ გეწაძეა ის მოსამართლე, რომელიც სააკაშვილის რეჟიმის დროს იუსტიციის უმაღლეს საბჭოში ბრძანდებოდა და ძალადობრივ მართლმსაჯულებას ახორციელებდა. მე იმედი მაქვს, რომ ევროპის ადამიანის უფლებათა სასამართლო გააკეთებს სწორ არჩევნას”, - განაცხადა ზაზა ხატიაშვილმა.
ცნობისთვის, მთავრობამ ადამიანის უფლებათა ევროპულ სასამართლოში საქართველოდან წარსადგენი 3 მოსამართლის კანდიდატურა შეარჩია. ესენი არიან: ლადო ჭანტურია, სოფო ჯაფარიძე და შოთა გეწაძე.
