აფგანი მისი პუბლიკაციების, საქართველოში ალიევის ოჯახის წევრების ბიზნესთან დაკავშირებით გამოძიების გამო დააკავეს, - ამის შესახებ აზერბაიჯანელი ჟურნალისტის მეუღლემ ლეილა მუსტაფაევამ საქართველოში აზერბაიჯანის საელჩოსთან გამართულ საპროტესტო აქციაზე განაცხადა.
მისი თქმით, ისინი სამართლიან გამოძიებას და აფგან მუხთარლის გათავისუფლებას ითხოვენ.
„ჩვენ აქ ვაპროტესტებთ აფგან მუხთარლის დაკავებას. ის გაიტაცეს და არაკანონიერად გადაიყვანეს აზერბაიჯანში. აზერბაიჯანის სამართალდამცავები არა აზერბაიჯანის უსაფრთხოებას ემსახურებიან, არამედ ერთი ოჯახის, ალიევების ოჯახის ბრძანებებს ასრულებენ. აფგანი მისი პუბლიკაციების, საქართველოში ალიევის ოჯახის წევრების ბიზნესთან დაკავშირებით გამოძიების გამო დააკავეს. ჩვენ სამართლიან გამოძიებას და აფგან მუხთარლის გათავისუფლებას ვითხოვთ“, -აღნიშნა ლეილა მუსტაფაევამ.
შეგახსენებთ, აზერბაიჯანელი ჟურნალისტი არსებული ინფორმაციით, თბილისიდან გაიტაცეს და იგი ბაქოშია დაპატიმრებული. ჯერჯერობით უცნობია, როგორ მოხდა მისი საზღვარზე გადაყვანა. თბილისში გაუჩინარებული აზერბაიჯანელი ჟურნალისტის თქმით, ის აზერბაიჯანის მხარეს საქართველოს უშიშროების ძალებმა გადასცეს.
საქმესთან დაკავშირებით, საქართველოს შსს-მ გამოძიება დაიწყო საქართველოს სსკ-ს 143-ე მუხლით, რაც თავისუფლების უკანონო აღკვეთას გულისხმობს.
