მოსამართლეთა მინიმალური რაოდენობა უზენაეს სასამართლოში იქნება 28, - ამის შესახებ პარლამენტის თავმჯდომარე, ირაკლი კობახიძემ ამბროლაურში, საკონსტიტუციო ცვლილებების საყოველთაო განხილვის დროს განაცხადა.
როგორც პარლამენტის თავმჯდომარემ აღნიშნა, კონსტიტუციაში, სასამართლო ხელისუფლების მხრივ, უამრავი ცვლილებაა შეტანილი, რაც სასამართლოს დამოუკიდებლობის შემდგომ განმტკიცებას ემსახურება. მისივე განცხადებით, უზენაეს სასამართლოში მოსამართლეების წარდგენაზე პასუხისმგებელი იუსტიციის უმაღლესი საბჭო იქნება.
„დღეს 13 მოსამართლეა უზენაეს სასამართლოში, რაც სერიოზულ პრობლემებს წარმოშობს მთლიანად სასამართლო სისტემაში. გადატვირთულია უზენაესი სასამართლო, რაც უარყოფითად აისახება სისტემის ფუნქციონირებაზე.
გათვალისწინებულია, რომ მოსამართლეთა მინიმალური რაოდენობა უზენაეს სასამართლოში იქნება 28. გარდა ამისა, უკეთ წესრიგდება უზენაესი სასამართლოს მოსამართლეთა წარდგენის წესი. იუსტიციის უმაღლესი საბჭო პასუხისმგებელი იქნება მოსამართლეების წარდგენაზე უზენაეს სასამართლოში. ასევე, დადგენილია მოსამართლეთა შეუცვლელობის პრინციპი, რაც გულისმხობს იმას, რომ დაუშვებელი იქნება მოსამართლეზე ყოველგვარი ზეწოლა. საქართველოში ასეთი პრაქტიკა იყო, როდესაც მოსამართლეს მივლინებაში უშვებდნენ ერთი რეგიონიდან მეორეში იმისათვის, რომ გარკვეული დისკომფორტი შეექმნათ მისთვის, რაც ზეწოლისთვის გამოიყენებოდა. ამას გამორიცხავს ის რეგულაცია, რომელიც წარმოდგენილია ახალ რეგულაციაში“, - დასძინა ირაკლი კობახიძემ.
