ჩვენ ათი მტკიცებულება გვქონდა წარდგენილი, რომლებიც ძირითადად შუამდგომლობების დაუშვებლობას ისახავდა მიზნად, მოსამართლემ არც ერთი არ ცნო, - ამის შესახებ ე.წ. ციანიდის საქმეში ბრალდებული დეკანოზ გიორგი მამალაძის ადვოკატმა მიხეილ რამიშვილმა ჟურნალისტებს განუცხადა.
მისი განცხადებით, ის, რომ დღევანდელი სასამართლო პროცესი არ იყო საჯარო, ნიშნავს იმას, რომ საზოგადოებას არ სცოდნოდა, რამდენად იყო პროკურატურის მიერ წარმოდგენილი მტკიცებულებები კანონის დარღვევით მოპოვებული.
"ის, რომ დღევანდელი სასამართლო პროცესი არ იყო საჯარო, ნიშნავს იმას, რომ აარიდეს თავი, საზოგადოებას სცოდნოდა, თუ რამდენად იყო პროკურატურის მიერ წარმოდგენილი მტკიცებულებები კანონის დარღვევით მოპოვებული. ჩვენ ათი მტკიცებულება გვქონდა წარდგენილი, რომლებიც ძირითადად შუამდგომლობების დაუშვებლობას ისახავდა მიზნად. მოსამართლემ არც ერთი არ ცნო. შუამდგომლობა გვქონდა ციანიდის ამოღებასთან დაკავშირებითაც და საგამოძიებო მოქმედებების ჩატარების შემდგომ მოპოვებული მტკიცებულებების მიმართებითაც, თუმცა მოსამართლემ გააკეთა განმარტება, რომ თუ პროკურატურა აწარმოებს გამოძიებას, მას ადგილი აქვს შეზღუდული და მაინც და მაინც პიროვნების მიყვანა უნდა მოხდეს პროკურატურაში. ეს იყო ძალიან აბსურდული განმარტება, ასეთი რამ სისხლის სამართლის კოდექსში არ წერია. სისხლის სამართლის კოდექსში წერია, რომ თუ სამართალდამცავი აკავებს პირს, ის უნდა მიიყვანოს უახლოეს საგამოძებო ორგანოში”, - განაცხადა რამიშვილმა.
