კარგია ახალგაზრდა იურისტები, მაგრამ სჯობს ვიყოთ უფრო მეტად იურისტები, ვიდრე ახალგაზრდები, - ამის შესახებ იუსტიციის უმაღლესი საბჭოს მდივანმა ლევან მურუსიძემ სააპელაციო სასამართლოს მოსამართლედ მის შესაძლო უვადოდ დანიშვნასთან დაკავშირებით, არასამთავრობო ორგანიზაციების შეფასებებზე კომენტირებისას განაცხადა.
მისი თქმით, მას სურს რჩევა მისცეს „ახალგაზრდა იურისტებს“. მისი განცხადებით ტერმინი – ახალგაზრდა იურისტები არის შესანიშნავი და ძალიან კარგი, მაგრამ აქვე, მისი თხოვნა და მოწოდებაა, ყურადღება გაამახვილონ არა სახელწოდების პირველ სიტყვაზე – ახალგაზრდებზე, არამედ იურისტობასაც მიხედონ ცოტა.
მისივე განცხადებით, თუ არასამთავრობო ორგანიზაციებს სურთ ურთიერთობა და თანამშრომლობა, ეს უნდა იყოს ურთიერთპატივისცემის დონეზე.
"არასამთავრობო ორგანიზაციებს მოვუწოდებ, თუ ისინი სახელმწიფოებრივად იფიქრებენ, უნდა გააანალიზონ ერთი ფაქტი, რომ ლევან მურუსიძე არის იუსტიციის უმაღლესი საბჭოს მდივანი, რომელიც აირჩია მოსამართლეთა კონფერენციამ. თუ არასამთავრობო ორგანიზაციებს სურთ ურთიერთობა და თანამშრომლობა, ეს უნდა იყოს ურთიერთპატივისცემის დონეზე. მე მაგალითად, პატივს ვცემ „ახალგაზრდა იურისტების“ გადაწყვეტილებას, რომელმაც ანა ნაცვლიშვილი აირჩია თავის თავმჯდომარედ. აქედან გამომდინარე, არ მიკადრებია საკუთარი თავისთვის, რომ მესაუბრა იმაზე, შეესაბამება თუ არა ქალბატონი ანა თანამდებობას”, - განაცხადა ლევან მურუსიძემ, რომელმაც აქვე აღნიშნა, რომ კანონი ყველასთვის ერთი უნდა იყოს და კონკრეტულ პიროვნებებზე არ უნდა იყოს საუბარი.
“მაშინ ჩავწეროთ კანონში, რომ უვადოდ გადაინიშნოს ყველა მოსამართლე, გარდა ლევან მურუსიძისა. არასამთავრობო ორგანიზაციებმა, რომლებიც მხარს უჭერენ ვენეციის კომისიას, დაანებონ ორმაგ სტანდარტებს თავი”, - განაცხადა მურუსიძემ.
