კოალიცია დაუშვებლად მიიჩნევს იუსტიციის უმაღლესი საბჭოს საჯარო განცხადების საფუძველზე რაიმე ტიპის საკანონმდებლო ინიციტივის შემუშავებას, მით უფრო მის მხარდაჭერას, - ამის შესახებ კოალიცია ,,მედიის ადვოკატირებისვის“ განცხადებაშია აღნიშნული.
როგორც განცხადებაში წერია, იუსტიციის უმაღლესი საბჭოს სურვილი, მოსამართლეებთან დაკავშირებული თემების გაშუქების განსაკუთრებული რეგულირების თაობაზე, საფრთხის შემცველია გამოხატვის თავისუფლებისათვის
"იუსტიციის უმაღლესი საბჭოს საფრთხისშემცველი განცხადება იუსტიციის უმაღლესი საბჭოს სურვილი, მოსამართლეებთან დაკავშირებული თემების გაშუქების განსაკუთრებული რეგულირების თაობაზე, საფრთხის შემცველია გამოხატვის თავისუფლებისათვის.
კოალიცია ,,მედიის ადვოკატირებისვის“ შეახსენებს იუსტიციის უმაღლესი საბჭოს წევრებს, რომ გამოხატვის თავისუფლების ერთ-ერთი გარანტორია მედიის თვითრეგულირების ის სისტემა, რომელსაც ქართული საკანონმდებლო სივრცე ცნობს.
გაკვირვებას იწვევს საბჭოს მიერ 26 აპრილს გავრცელებულ საჯარო განცხადებაში საუბარი თვითრეგულირების არაეფექტურობაზე. რამდენადაც ჩვენთვის ცნობილია, იუსტიციის უმაღლესი საბჭოს არც ერთ წევრს, განცხადებაში მოყვანილ არც ერთ ე.წ. ,,გამოხატვის თავისუფლებას გაცდენილ“ მედიაგაშუქებაზე თვითრეგულირების არც ერთი ინსტიტუციისთვის - არც ჟურნალისტური ეთიკის ქარტიისთვის და არც თავად განცხადებაში ხსენებული მაუწყებლების თვითრეგულირების საბჭოებისთვის, დადგენილი წესით არ მიუმართავს.
ამასთან, იუსტიციის უმაღლესი საბჭო ითხოვს ისეთი გამონათქვამების რეგულირებას რაც თავისი არსით წარმოადგენს აზრს და არა ფაქტს (მაგალითად ,,მანქურთი”). აზრი დაცულია გამოხატვის თავისუფლებით და სასამართლოს ავტორიტეტის დაცვა არ წარმოადგენს საკმარის საფუძველს სასამართლოს მიმართ კრიტიკულად განწყობილი პირისათვის საკუთარი მოსაზრების ამ ფორმით გამოხატვის შესაზღუდად.
კოალიცია დაუშვებლად მიიჩნევს იუსტიციის უმაღლესი საბჭოს საჯარო განცხადების საფუძველზე რაიმე ტიპის საკანონმდებლო ინიციტივის შემუშავებას, მით უფრო მის მხარდაჭერას", - ნათქვამია განცხადებაში.
