ე.წ. ციანიდის საქმეზე ბრალდებულის, დეკანოზ გიორგი მამალაძის ადვოკატებმა და „ადამიანის უფლებათა ცენტრის“ იურისტმა საქართველოს მთავარ პროკურატურაში განცხადება შეიტანეს.
ადვოკატები გაუთქმელობის პირობის მოხსნას ითხოვენ, რადგან მათი თქმით, პროკურატურა არღვევს თანასწორობის პრინციპს.
ადვოკატები აცხადებენ, რომ თუ პროკურატურა სამი დღის ვადაში გაუთქმელობის პირობას არ მოუხსნის, ისინი არ გამორიცხავენ, სტრასბურგის სასამართლოს მიმართონ.
„ვერ ვახერხებთ დეკანოზის დაცვას, რადგან ვერ ვასაჯაროებთ საქმის დეტალებს და ეს ერთგვარად არის შეჯიბრებითობის და თანასწორობის პრინციპის დარღვევა. ვასაჩივრებთ პროკურატურაში და იმედი გვაქვს, მოგვეხსნება გაუთქმელობის პირობა. წინააღმდეგ შემთხვევაში ჩვენ სტრასბურგის სასამართლოს მივმართავთ, ჩვენ ვიცავთ კანონს და მივმართავთ პროკურატურას საჩივრით, რომ იქნებ ამ ჯერზე მაინც დაკმაყოფილდეს მოთხოვნა, სამ დღეში უნდა გაეცეს ჩვენ საჩივარს პასუხი“, - განაცხადა გიორგი ფანცულაიამ.
„ჩვენ ვთანამშრომლობთ დეკანოზის ადვოკატებთან, ერთობლივად მოვამზადეთ საჩივარი და მივმართავთ პროკურატურას, რომ ადვოკატებს მოეხსნათ გაუთქმელობის პირობა, რადგან ვერ ხერხდება ადვოკატებისგან დეკანოზის სათანადო დაცვა. სამ დღეში გვეცოდინება პასუხი რას გვეტყვის პროკურატურა და არ არის გამორიცხული საქმე სტრასბურგში წავიდეს“, - განაცხადა „ადამიანის უფლებათა ცენტრის იურისტმა“ ეკა ლომიძემ.
