როგორც კი დავაპირეთ ბრალდებულისთვის კრიტიკული შეკითხვების დასმა, მან საერთოდ უარი განაცხადა გამომძიებლებთან შეხვედრაზე, კიდევ ერთხელ დაასახელა მიზეზად ჯანმრთელობის მდგომარეობა, - ამის შესახებ განცხადება პროკურორმა ჯარჯი წიკლაურმა გააკეთა. მისივე თქმით, ექიმმა დეკანოზი გიორგი მამალაძე ორჯერ გასინჯა და დაადასტურა, რომ მისი ჯანმრთელობა ნორმაშია,
”დღეს გამოვცხადით ბრალდებულის დაკითხვის მიზნით. ბევრი შეკითხვა გვქონდა დასასმელი და გვქონდა მოლოდინი, რომ მივიღებდით ამომწურავ პასუხებს - ასე ვიყავით შეთანხმებული თავად ადვოკატებთან და ბრალდებულთან. იმის გათვალისწინებითაც, რომ მიდიოდა ბრალდებები, თითქოს ჩვენ ვაჭიანურებდით პროცესებს”, - განაცხადა ჯარჯი წიკლაურმა.
მისივე თქმით, პროკურატურამ შეადგინა ოქმი, რომელშიც წერია, რომ ექიმებმა ორჯერ გასინჯეს ბრალდებული და მისი ჯანმრთელობის მდგომარეობა აბსოლუტურად ნორმაშია.
ადვოკატების განცხადებით კი, სასულიერო პირის ჯანმრთელობის მდგომარეობა მოულოდნელად გაუარესდა.მათი ინფორმაციით, მამალაძეს დაბალი წნევა და ღებინება აღენიშნება.
