სააპელაციო სასამართლო ნიკა ლომინაძის მკვლელობაში ბრალდებულების განაჩენს დღეს გამოაცხადებს. შესაძლოა, 11 წლიანი პატიმრობის შემდეგ გიორგი გვიჩიანი და ნიკა ჩემია გატავისუფლდნენ.
გიორგი გვიჩიანის ადვოკატების განცხადებით, პროკურატურის მიერ წარდგენილი მტკიცებულებები და ახალი გამოძიება, ჩემიას და გვიჩიანის უდანაშაულობას ადასტურებს. ამასთან უფლებადამცველების თქმით, პროკურატურის მტკიცებულებებში იკვეთება რამდენიმე პირი, ვისაც შეიძლება ნიკა ჩემიას და გია გვიჩიანის ნაცვლად ბრალი წაუყენონ.
გელა ნიკოლეიშვილის განცხადებით, სასამართლო პროკურატურის მიერ დაყენებულ შუამდგომლობას გაითვალისწინებს და მისი დაცვის ქვეშ მყოფებს სასჯელაღსრულების დაწესებულებიდან სწორედ დღეს გაათავისუფლებენ. სხდომა სააპელაციო სასამართლოში დღეს 11:30 გაიმართება.
ლომინაძის მკვლელობის საქმეზე გია გვიაჩიანს და ნიკა ჩემიას სამუდამო პატიმრობა ჰქონდათ მისჯილი, მოგვიანებით ეს სასჯელი 20-წლიანი პატიმრობით შეიცვალა. კომპანია "თელასის" ფინანსური მენეჯერი ნიკა ლომინაძე 2002 წელს, თბილისში, ბახტრიონის ქუჩაზე, საკუთარ სახლში მოკლეს. გია გვიჩიანი, რომელიც "თელასში" ექსპერტად მუშაობდა, დამნაშავედ ცნეს და 2006 წელს დააკავეს.
