”ევროპულმა საქართველომ” მოსამართლე ნატა ნაზღაიძის ოჯახის მიერ სახელმწიფო ბიუჯეტიდან მილიონი ლარის მიღების თაობაზე გამოძიების დაწყების მოთხოვნით პროკურატურას მიმართა. განცხადება საგამოძიებო უწყებაში, პარტიის წევრმა ირაკლი აბესაძემ შეიტანა.
მისი თქმით, მოსამართლის ოჯახზე დედაქალაქის ბიუჯეტიდან კომპენსაცია ისე გაიცა, რომ დაირღვა 2015 წლის 13 ივნისის სტიქიის შემდეგ დამტკიცებული ყველა წესი და ნორმა.
,,მაშინ როდესაც რამდენიმე მოქალაქე, რომელიც რეალურად დაზარალდა სტიქიით, დაენგრათ საცხოვრებელი სახლები და მათ მერია სხვადასხვა ბიუროკრატიული მიზეზით, უარს ეუბნება კომპენსაციის გაცემაზე, აღმოჩნდა, რომ ერთი მოქალაქისთვის შესაძლებელი გახდა ყველა კანონის, ყველა ნორმატიული აქტის გვერდის ავლით და დარღვევით მილიონი ლარის კომპენსაციის მიღება, ნაწილი თანხის, ნაწილი კი სახელმწიფო ქონების ხარჯზე, - განაცხადა ირაკლი აბესაძემ.
მისივე თქმით, მოსამართლე ნატა ნაზღაიძის ძმისთვის ჩამორთმეული ქონება, რომელიც 13 ივნისის სტიქიის ზონაში მდებარეობდა, წარმოადგენს ცარიელ მიწის ნაკვეთს. როგორც აბესაძემ განმარტა, საკრებულოს უმრავლესობამ უარი თქვა კომპენსაციები გაეცა იმ პირებზე, ვისაც სტიქიის ზონაში მხოლოდ მიწის ნაკვეთები ჰქონდათ.
ტელეკომპანია ”რუსთავი 2”-ის ინფორმაციით, სააპელაციო სასამართლოში, ”რუსთავი 2”-ის საქმის განმხილველი კოლეგიის თავმჯდომარის, მოსამართლე ნატა ნაზღაიძის ძმას, ზვიად ნაზღაიძეს თბილისის მერიამ სახელმწიფოს კუთვნილი 1 მილიონი ლარის ქონება გადასცა.
