ფარული მოსმენების განსახორციელებლად ახალი უწყება შეიქმნება, რომელიც ანგარიშვალდებული იქნება პარლამენტისა და პრემიერ-მინისტრის წინაშე, - ამის შესახებ საპარლამენტო უმრავლესობის ლიდერმა არჩილ თალაკვაძემ განაცხადა.
ე.წ. მოსმენების შესახებ ახალი კანონის კომენტირებისას მან ასევე განმარტა, რომ ფარული საგამოძიებო მოქმედებების ფუნქცია გამოიყოფა ცალკე და გადაეცემა საჯარო სამართლის იურიდიულ პირს, რომელსაც არ ექნება საგამოძიებო ფუნქცია.
,,უნდა მოხდეს ახალი კანონპროექტების ინიცირება, რომელიც მაქსიმალურად შესაბამისი იქნება საკონსტიტუციო სასამართლოს გადაწყვეტილებასთან. ფარული საგამოძიებო მოქმედებების ფუნქცია გამოიყოფა ცალკე და გადაეცემა საჯარო სამართლის იურიდიულ პირს, რომელსაც არ ექნება საგამოძიებო ფუნქცია და ეს არის ძალიან მნიშვნელოვანი. ძლიერდება კონტროლისა და ანგარიშვალდებულების მექანიზმები, რაც ჩვენ, როგორც პარლამენტს და ხელისუფლების სხვა შტოებს, მოგვცემს შესაძლებლობას, რომ განახორციელოს ზედამხედველობა და კონტროლი ფარულ საგამოძიებო მოქმედებებზე. რჩება ისეთი მნიშვნელოვანი მექანიზმები, როგორიცაა საქართველოს პარლამენტის ზედამხედველობა, პერსონალურ მონაცემთა დაცვის ინსპექტორი და სხვა მექანიზმები. მნიშვნელოვანია, რომ პარლამენტის ნდობის ჯგუფს ეზრდება მანდატი და ექნება ეფექტური შესაძლებლობა, განახორციელოს ზედამხედველობა და კონტროლი ფარულ საგამოძიებო მოქმედებებზე”, - განაცხადა არჩილ თალაკვაძემ.
მისივე თქმით, აღნიშნულ საჯარო სამართლის იურიდიულ პირს, რომელიც ფარული საგამოძიებო მოქმედებებისთვის შეიქმნება, დამოუკიდებლობის მაღალი გარანტიები ექნება.
