საქართველოს პარლამენტის წევრმა, ზესტაფონის მაჟორიტარმა დეპუტატმა, შალვა კიკნაველიძემ აშშ-ში ვიზიტის ფარგლებში შეხვედრები ამერიკის სახელმწიფო დეპარტამენტში, გამართა. შეხვედრას აშშ-ს სახელმწიფო დეპარტამენტის კავკასიისა და ცენტრაული აზიის სამმართველოს უფროსი - ტობი დევისი, ადამიანის უფლებებისა და დასაქმების ბიუროს საგარეო საქმეთა ოფიცერი - ვენდი სილვერმანი და საქართველოს საკითხების უფროსი ოფიცერი - ტრეისი ნეველი ესწრებოდნენ.
ვაშინგტონში მხარეებმა ქართულ-ამერიკული ურთიერთობები, ქვეყნებს შორის სტრატეგიული პარტნიორობისა და თანამშრომლობის საკითხები განიხილეს. საუბარი შეეხო საქართველოსა და რეგიონში მიმდინარე პოლიტიკურ და ეკონომიკურ პროცესებსაც, მათ შორის საქართველოს ევროატლანტიკურ კურსაა და ამ გზაზე აშშ-ს მხარდაჭერას.
