არასამთავრობო ორგანიზაცია "ადამიანის უფლებათა პრიორიტეტი" სტრასბურგის ადამიანის უფლებათა სასამართლოში ყოფილი სახალხო დამცველის სოზარ სუბარის და მოქალაქე შიო კობიძის საჩივრებს გაგზავნის (საქართველოს მთავრობის წინააღმდეგ).
როგორც "ჯი-ეიჩ-ენს" ორგანიზაციიდან აცნობეს, სტრასბურგში სუბარისა და კობიძის ინტერესებს "ადამიანის უფლებათა პრიორიტეტის" ადვოკატები დაიცავენ.
შეგახსენებთ, რომ სოზარ სუბარი 2007 წლის 7 ნოემბერს სპეცდანიშნულების რაზმების მიერ მშვიდობიანი მანიფესტანტების დარბევისას, ასრულებდა კანონით მასზე დაკისრებულ მოვალეობას და თავად გახდა ნიღბიან პირთა მხრიდან ფიზიკური შეურაცხყოფის მსხვერპლი. კერძოდ, ომბუდსმენი გაემოსარჩლა მოქალაქეს, რომელსაც სპეცდანიშნულების რაზმის წევრები სცემდნენ. ნიღბიანებმა, როდესაც იცნეს სახალხო დამცველი მისკენ გადაინაცვლეს და უმოწყალოდ სცემეს. ექს-სახალხოდამცველის მიმართ დარღვეულია ევროკონვენციის რიგი მუხლი.
რაც შეეხება მოქალაქე შიო კობიძეს, ის 7 ნოემბრის ცნობილი მოვლენების დროს გამოესარჩლა ჟურნალისტ გოგონას, რომელსაც სპეცდანიშნულების რაზმის წევრები სცემდნენ, რაც მასზე თავდასხმის მიზეზი გახდა. აღსანიშნავია, რომ ამ ფაქტის შემდეგ, აფხაზეთის ომის ვეტერანი და მესამე ჯგუფის ინვალიდი კობიძე მეორე ჯგუფის ინვალიდი გახდა, რის გამოც, მან სამსახური დაკარგა.
