თბილისის ეროვნულ პარკში საგურამოს უბანზე რეინჯერებსა და ბრაკონიერებს შორის დაპირისპირება მოხდა. ეროვნული პარკის რეინჯერებმა პატრულირების დროს ირემზე მონადირე ბრაკონიერების ჯგუფი შენიშნეს. დაცული ტერიტორიების სააგენტოს ხელმძღვანელის, ლაშა მოისწრაფიშვილის თქმით, ბრაკონიერები ბრძანებას არ დაემორჩილნენ და რეინჯერების მისამართით ისროლეს. საპასუხო სროლის შედეგად ერთი ბრაკონიერი მსუბუქად დაიჭრა, რის შემდეგაც ის დააკავეს. მომხდართან დაკავშირებით მიმდინარეობს გამოძიება. დაჭრილი ბრაკონიერი რეინჯერებმა უკანონო ნადირობის ფაქტზე ერთი თვის წინაც დააკავეს.
