ნიკა გვარამიას მიერ მედიასაშუალებებით გავრცელებული ინფორმაციის საფუძველზე, შსს-მ გამოძიება დაიწყო. ამის შესახებ შინაგან საქმეთა სამინისტროს განცხადებაშია აღნიშნული.
„შსს-ს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს კიბერდანაშაულთან ბრძოლის სამმართველომ, ტელეკომპანია „რუსთავი 2“-ის გენერალური დირექტორის, ნიკოლოზ გვარამიას მიერ მედიასაშუალებებით გავრცელებული ინფორმაციის საფუძველზე გამოძიება დაიწყო“ - აცხადებენ შსს-ში.
შსს-ს ცნობით, გამოძიება კომპიუტერულ სისტემაში უნებართვო შეღწევისა და პირადი მიმოწერის, ტელეფონით საუბრის ან სხვაგვარი ხერხით შეტყობინების საიდუმლოების დარღვევის ფაქტზე მიმდინარეობს (საქართველოს სსკ-ს 284-ე და 159-ე მუხლებით).
ტელეკომპანია „რუსთავი 2“-ის გენერალური დირექტორი ნიკა გვარამია მისი და მამუკა ახვლედიანის ფარული ჩანაწერის გამოქვეყნების საკითხს სპეციალური ბრიფინგით გამოეხმაურა და აღნიშნა, რომ ჩანაწერი გაკეთებულია მის მიერ, მაგრამ ის მისი გავრცელებული არ არის. „მამუკა ახვლედიანი - ნიკა გვარამია“, - ამ სათაურით გამოქვეყნდა დღეს მორიგი ფარული ჩანაწერი იუთუბგვერდზე - Creative Georgia News, რომელშიც, სავარაუდოდ, თბილისის საქალაქო სასამართლოს ყოფილი თავმჯდომარისა და „რუსთავი 2“-ის გენდირექტორის საუბარი ისმის.
