„გაზის ტრანსპორტირების სისტემაში“ ბუნებრივი აირის ოდორიზაციასთან დაკავშირებით განმარტება საქართველოს ენერგეტიკის მინისტრის მოადგილემ ირაკლი ხმალაძემ გააკეთა და აღნიშნა, რომ დაწყებულია მოკვლევა ოდორანტის ზედმეტი დოზის გაშვებასთან დაკავშირებით, რამაც გუშინ დედაქალაქში მკვეთრი სული გამოიწვია.
,,გუშინ სისტემაში ოდორანტის შეშვება ზედმეტი დოზით მოხდა, რასაც მოჰყვა ასეთი სუნი. ამას არ მოჰყოლია არანაირი გაჟონვა. ფაქტზე უკვე დაწყებულია მოკვლევა გაზის ტრანსპორტირების კომპანიის მიერ და პირები, რომლებიც ამაში იყვნენ ჩართულები, აუცილებლად აგებენ პასუხს. „გაზის ტრანსპორტირების კომპანია“ არის შეზღუდული პასუხისმგებლობის საზოგადოება, რომელიც ბუნებრივი გაზის ტრანსპორტირებას ახორციელებს და ის არის პასუხისმგებელი ბუნებრივი გაზის ოდორიზაციაზე. მათ მიერ მოხდა დამატებითი ოდენობების შეშვება ტრანსპორტირების სისტემაში, რაზედაც მათი მონიტორინგის სამსახურის მიერ მოკვლევა დაწყებულია“, - განმარტა ირაკლი ხმალაძემ.
რაც შეეხბა შპს "საქართველოს გაზის ტრანსპორტირების კომპანიას", აქ ბუნებრივი გაზის ჭარბი ოდორიზებით გამოწვეულ მკვეთრ სუნთან დაკავშირებით განაცხადეს, რომ "მყისიერი რეაგირება მოახდინეს და არანაირი ტექნიკური პრობლემა არ არსებობს". კომპანიის ინფორმაციით, ოდორიზება არანაირ საფრთხეს არ წარმოადგენს სიცოცხლისა და კანმრთელობისათვის. თუმცა, ბოლო მონაცემებით, გუშინ, ბუნებრივი აირის ინტოქსიკაციისთვის დამახასიათებელი სიმპტომებით სულ 11 პაციენტის ჰოსპიტალიზაცია გახდა საჭირო.
