პაატა ბურჭულაძის ყოფილმა თანაგუნდელმა ხათუნა ლაგაზიძემ პროკურატურას მასზე განხორციელებული ზეწოლის ფაქტთან დაკავშირებით ინფორმაცია მიაწოდა.
როგორც თბილისის მთავარი პროკურატურიდან გამოსვლის შემდეგ ლაგაზიძემ აღნიშნა, ის მის მიერ რამდენიმე დღის წინ გაკეთებულ განცხადებასთან დაკავშირებით გამოიკითხა.
საუბარია იმ განცხადებაზე, სადაც უსაფრთხოების მიზნით, ის სახელმწიფოსგან მისი და მისი ოჯახის წევრების დაცვას ითხოვდა. ლაგაზიძის განცხადებით, დღეს ის თავს დაცულად გრძნობს თუმცა, არ აკონკრეტებს დაუნიშნავენ თუ არა მას დაცვას.
ლაგაზიძის თქმით, გამოკითხვის დროს საუბარი შეეხო ,,სახელმწიფო ხალხისათვის“ აჭარის რეგიონის სიის პირველ ნომერს გიორგი კალაძეს, რომელიც ლაგაზიძის მტკიცებით, კრიმინალური მენტალობის მქონე პირია, ზედმეტ სახელად „კალოშა“.
ხათუნა ლაგაზიძემ პაატა ბურჭულაძის პარტიიდან გიორგი რუხაძის წასვლის ფაქტიც შეაფასა და განაცხადა, რომ რუხაძე არ იქნება ბოლო ვინც პარტიას დატოვებს.
