იმედს გამოვთქვამ, რომ პარლამენტის სრული შემადგენლობა მემკვიდრეობად დატოვებს იმას, რომ საქართველოს უზენაეს სასამართლოს შემატებს სამ კვალიფიციურ, დამოუკიდებელ და მიუკერძოებელ იურისტს, - ამის შესახებ პრეზიდენტის საპარლამენტო მდივანმა ანა დოლიძემ იურიდიულ საკითხთა კომიტეტის სხდომის დასრულების შემდეგ განაცხადა.
"მინდა ძალიან დიდი მადლობა გადავუხადო იურიდიულ საკითხთა კომიტეტის წევრებს, რომ ისინი მოეკიდნენ სახელმწიფოებრივად, დიდი პასუხისმგებლობით ამ საკითხს და მხარი დაუჭირეს უზენაესი სასაართლოს მოსამართლის თანამდებობაზე ჩვენს მიერ წარმოდგენილ სამ კანდიდატურას. აქვე მინდა იმედი გამოვთქვა, რომ საქართველოს პარლამენტის სრული შემადგენლობა ასევე სახელმწიფოებრივად მოეკიდება ამ საკითხს და მემკვიდრეობად დატოვებს იმას, რომ საქართველოს უზენაეს სასამართლოს შემატებს სამ კვალიფიციურ, დამოუკიდებელ და მიუკერძოებელ იურისტს", - განაცხადა ანა დოლიძემ.
პარლამენტის იურიდიულ საკითხთა კომიტეტმა პრეზიდენტის მიერ წარდგენილ უზენაესი სასამართლოს მოსამართლეობის კანდიდატებს - ლევან ბოძაშვილს, ნონა თოდუას და თამარ ლალიაშვილს მხარი დაუჭირა.
ლევან ბოძაშვილმა სხდომაზე დამსწრე შვიდი დეპუტატიდან შვიდივეს მხარდაჭერა მიიღო, ხოლო ნონა თოდუას და თამარ ლალიაშვილს ხუთ-ხუთმა დეპუტატმა დაუჭირა მხარი.
უზენაესი სასამართლოს მოსამართლეობის კანდიდატებთან დაკავშირებული საკითხი ხვალ დაგეგმილი პლენარული სხდომის დღის წესრიგში იქნება შეტანილი, თუმცა ამ დრომდე უცნობია, იქნება თუ არა კვორუმი ხვალინდელ სხდომაზე.
