იარაღის უკანონოდ შეძენა-შენახვისთვის ბრლდებული გიორგი ფეიქრიშვილი სასამართლო პროცესზე დაკავების დეტალებს იხსენებს და აცხადებს, რომ პოლიციას ის კარადის თავზე დაემალა, რადგან შსაძლოა ის მოეკლათ. მისი მტკიცებით, სამართალდამცავებმა 9 წლის შვილის თვალწინ ფიზიკური შეურაცხყოფა მიაყენეს არა მხოლოდ მას, არამედ მის მეუღლეს, დედას, სიდედრს.
,,რაღაცა დაარტყეს კარს და შემოვარდნენ. მე დავიმალე სახლში და როცა არ დავხვდი, დაიწყეს ჩხრეკა. ჩხრეკის დროს მიპოვეს კარადის თავზე და ჩამომიყვანეს. ერთ-ერთმა გამომძიებელმა ჩანთით იარაღი შემოდო იმ კარადის თავზე, სადაც ვიმალებოდი. მერე ვითომ არაფერი, ერთ ათ წუთში იპოვეს იარაღი და დამიწყეს ლაპარაკი - ეს რითი დადიხარ, რა არის და ა.შ", - განაცხადა ბრალდებულმა.
მისივე თქმით, აპირებდა გერმანიაში წასვლას, რადგამ ეუბნებოდნენ, რომ საქართველო უნდა დაეტოვებინა. ,,მეუბნებოდნენ, სისტემას ეჯახები რახან არ მიდიხარო. როგორ წავსულიყავი ასე უფულოდ? არ გამაჩნია არავითარი სახსრები. ვაპირებდი წასვლას. ბიძაჩემი ცხოვრობს გერმანიაში, გერმანიის მოქალაქეა და მასთან ვაპირებდი წასვლას ლეგალურად. ჩაწერილი ვიყავი საელჩოში 9 სექტემბერს, მაგრამ არ მაცადეს. ერთ წელიწადში ორჯერ ჩამიდეს იარაღი. არც დაელოდნენ ერთი წლის გასვლას მაინც. ჩამიდეს ნაგანი, აკაესი და ბოლოს ალბათ ტანკსაც ჩამიდებენ სახლში", -აღნიშნა ფეიქრიშვილმა.
მოსამართლის კითხვაზე, თუ რამ აიძულა კარადის თავზე დამალვა, ბრალდებულმა განუმარტა, რომ შიშის გამო დაიმალა.
"მეშინოდა, რომ არ მოვეკალი. პირდაპირ კარზე ბრახუნი იყო. არც გამოხმაურება რომ პოლიციაა ან რაღაც. პირდაპირ შემოამტვრიეს კარი. წინა დაკავებისაც ასე მეგონა რომ მომკლავდნენ", - განაცხადა ფეიქრიშვილმა.
გიორგი ფეიქრიშვილი და ნოდარ ნიშნიანიძე სამართალდამცველებმა 3 და 4 სექტემბერს დააკავეს. შსს-ს მიერ გავრცელებული ინფორმაციის თანახმად, პოლიციამ ნოდარ ნიშნიანიძის საცხოვრებელი სახლის ჩხრეკისას პისტოლეტი და 7 ცალი ვაზნა ამოიღო, გიორგი ფეიქრიშვილის ბინის ჩხრეკისას კი ავტომატური ცეცხლსასროლი იარაღი ერთი მჭიდით, 30 ცალი ვაზნა და ერთი შეკვრა, სავარაუდოდ, ნარკოტიკული ნივთიერება ამოიღო. არსებული ინფორმაციით, აღნიშნული პირების დაკავება შესაძლოა ვაკეში მომხდარ სოსო ჯოხაძის მკვლელობას უკავშირდებოდეს.
შეგახსენებთ, რომ დაკავებულის დედა, ნინო ფეიქრიშვილი ხელისუფლებას ზეწოლაში ადანასაულებს. ის ამბობს, რომ გუშინ მათთან სახლში"ქართული ოცნების" მაჟორიტარობის კანდიდატის დავით ჭიჭინაძის წარმომადგენელი იმყოფებოდა, რომელმაც არჩევნებში დახმარებისა და მხარდაჭერის სანაცვლოდ, დახმარება შესთავაზა.
