ყოფილი პრემიერ-მინისტრი ბიძინა ივანიშვილი ოზურგეთის თეატრის შენობასთან მყოფ აქციის მონაწილეებს - „ერთიანი ნაციონალური მოძრაობის“ ოზურგეთის ორგანიზაციის ლიდერებს გაესაუბრა. შეხვედრა თეატრის ფოიეში შედგა.
აქციის მონაწილეებმა ივანიშვილს ის დაპირებები შეახსენეს, რომელიც მან ოთხი წლის წინ გასცა, მათ შორის პენსიებთან დაკავშირებით.
ენმ-ს დეპუტატობის კანდიდატმა დავით მჟავანაძემ ექს-პრემიერს შეახსენა, რომ ხალხს პენსიის 250 ლარამდე გაზრდას დაჰპირდა. მანვე ანაბრებისა და თხილის ფასთან დაკავშირებითაც ისაუბრა, რომელიც, მჟავანაძის შეფასებით, ახლა შემცირებულია.
ივანიშვილი აქციის მონაწილეების განცხადებებს არ დაეთანხმა და მიმართა, მიაწოდონ კადრები, რომლებიც მსგავსი ტიპის დანაპირების გაცემას ასახავს.
შეხვედრისკენ ხალხს ივანიშვილმა მას შემდეგ მოუწოდა, რაც აქციის მონაწილეები სკანდირებდნენ - ,,მშიშარა, გაიქცა! " მან აღნიშნა, რომ არავის ემალება.
