გვიან ღამით, სოსო ჯოხაძის მკვლელობის საქმეზე დაკავებულ ბადრი ნათობაძეს ე.წ. მოდულის შენობაში ბრალი დამამძიმებელ გარემოებაში ჩადენილი განზრახ მკვლელობის – სსკ-ის 109-ე მუხლით წაუყენეს. მისი ადვოკატი ლევან პატარქალიშვილი აცხადებს, რომ ბადრი ნათობაძე ბრალს არ აღიარებს. ადვოკატის ინფორმაციით, დაკავებულს ფიზიკური დაზიანებები აქვს მიყენებული და ის ექსპერტიზის ჩატარებას ითხოვს.
შინაგან საქმეთა სამინისტროს თბილისის პოლიციის დეპარტამენტის დეტექტივების სამმართველოს და ვაკე-საბურთალოს სამმართველოს თანამშრომლებმა, 1981 წელს დაბადებული ბადრი ნათობაძე განზრახ მკვლელობისა და ცეცხლსასროლი იარაღის მართლსაწინააღმდეგო შეძენა-შენახვა-ტარების ბრალდებით, მკვლელობიდან მოკლე ხანში დააკავეს.
გამოძიებამ დაადგინა, რომ ბრალდებულმა მიმდინარე წლის 2 სექტემბერს, თბილისში, ვაკის რაიონში, ცეცხლსასროლი იარაღიდან გასროლით მრავლობითი ჭრილობა მიაყენა 1979 წელს დაბადებულ სოსო ჯოხაძეს და 1982 წელს დაბადებულ ზაქარია ჩიბუხაშვილს. ბრალდებული შემთხვევის ადგილიდან მიიმალა. ერთი დაჭრილი ადგილზე გარდაიცვალა, ხოლო მეორე – გადაყვანილია საავადმყოფოში.
