მთაწმინდის მაჟორიტარობის კანდიდატი ,,ნაციონალური მოძრაობიდან“ ნიკა რურუა აცხადებს, რომ იუსტიციის სახლის კუთვნილი ავტოსადგომი ფასიანი გახდა, რაც უკანონო გადაწყვეტილებაა. უწყებასთან დღეს გამართულ ბრიფინგზე რურუამ აღნიშნა, რომ ეს კიდევ ერთი ,,უპასუხისმგებლო გადაწყვეტილება“ იუსტიციის სამინისტროს ხელმძღვანელი პირებისგან.
„საქმე გვაქვს კიდევ ერთ უგუნურ გადაწყვეტილებასთან იუსტიციის სახლის ხელმძღვანელობისგან. პარკინგი სადაც 1 500 ავტომობილი ეტევა, ორი დღეა რაც ფასიანი გახდა. ეს არ არის კომერციული ფართი, რაშიც შეიძლება სახელმწიფომ ფული გააკეთოს“, - განაცხადა ნიკა რურუამ.
ავტოსადგომის ტარიფები შემდეგია: 0-დან 45 წუთის ჩათვლით ავტოსადგომზე ავტომობილის გაჩერება უფასოა; 46 წუთიდან ერთი საათის ჩათვლით მომსახურება 1 ლარია; ერთი საათიდან 2 საათის ჩათვლით ავტოსადგომის ღირებულება 2 ლარს შეადგენს; 2 საათიდან 12.00 საათის ჩათვლით 3 ლარი, ხოლო 12.00 საათიდან 24 საათის ჩათვლით ავტოსადგომის მომსახურება 5 ლარს შეადგენს.