გონიოში, სადაც ზღვაში დაკარგული სამხედრო მოსამსახურეების პატივის მიგების ცერემონიალი გაიმართება, საქართველოს კათოლიკოს-პატრიარქს, უწმინდესსა და უნეტარესს, ილია მეორეს ელოდებიან.
ცერემონიალს სამინისტროს წარმომადგენლები, სამხედრო მოსამსახურების ოჯახის წევრები, ნათესავები, აჭარის მთავრობის ხელმძღვანელი და წარმომადგენლები დაესწრებიან. მასში მონაწილეობას მიიღებენ საქართველოს შინაგან საქმეთა სამინისტროს სასაზღვრო პოლიციის სანაპირო დაცვის თანამშრომლები, რომლებიც დაკარგული სამხედროების პატივის მისაგებად ზღვაში ორ გვირგვინს ჩაუშვებენ.
გონიოში, წვრთნების დროს დაკარგული იაგო შარაძის ოჯახის წევრების ნაწილი დღეს დაგეგმილი ცერემონიის გამო უკმაყოფილებას გამოთქვამს.
შარაძის ბაბუა და ბებია აცხადებენ, რომ მათთვის მისაღები იქნებოდა პატივის მიგების ცერემონიის გამართვა მხოლოდ ცხედრის პოვნის შემდეგ.
თავის მხრივ, შარაძის დედა ელენე მაკრიდისი შიმშილობას აგრძელებს და აცხადებს, რომ პროტესტის უკიდურეს ფორმას იქამდე არ შეწყვეტს, სანამ სამძებრო ღონისძიებები არ განახლდება. ამის პარალელურად, ელენე მაკრიდისი მოხარულია, რომ მისი შვილის სულისთვის პატრიარქი ილოცებს.
შარაძის მამა, ვლადიმერ შარაძე კი თავდაცვის სამინისტროს თხოვნით მიმართავს, გააგრძელოს სამძებრო ღონისძიებები.
კიდევ ერთი დაკარგულის, გიორგი ნანეტაშვილის ოჯახის წევრებს გონიოს სანაპიროსთან ამ წუთებში ელოდებიან.