ძლიერმა წვიმამ ბათუმში რამდენიმე ქუჩის დატბორვა გამოიწვია.
ბათუმის მერიის ინფორმაციით, პრობლემები ძირითადად იმ მონაკვეთებზე შეიქმნა, სადაც წყალარინებისა და სანიაღვრე სისტემების რეაბილიტაცია ჯერ არ დასრულებულა, ან მომავალში უნდა ჩატარდეს. პრობლემები შეიქმნა აგრეთვე ცენტრალურ მაგისტრალზე ჩაქვში, მახინჯაურსა და თამარის დასახლებაში. საგანგებო რეჟიმში მუშაობს შპს ,,ბათუმის წყალი“.
„მორიგე ბრიგადები ახორციელებენ უწყვეტ მონიტორინგს უბნების მიხედვით. ხორციელდება წყლის ამოტუმბვითი სამუშაოები. სანიაღვრე წყლების სწრაფი გადინების მიზნით გახსნილია ზღვაში გამსვლელი ყველა არხი.
დატბორვასთან დაკავშირებით ამ დროისთვის სულ 17-მდე შეტყობინება დაფიქსირდა. ყველა გამოძახებაზე ხდება დროული რეაგირება.
ჩაისუბნისა და ჩაქვის სათავე ნაგებობებზე წყლის ამღვრევის გამო წყალმომარაგება შეწყვეტილი აქვთ ე.წ. ძველი ქსელის აბონენტებს. წყალმომარაგება წყლის დონის დაწევისა და წყლის დაწმენდისთანავე აღდგება.
გადაადგილების პრობლემა არ შექმნია სასწრაფო-სამედიცინო დახმარების ბრიგადებს. რეგულარულ რეჟიმში მოძრაობს საზოგადოებრივი ტრანსპორტი», აცხადებენ ბათუმის მერიაში.