3 და 4 სექტემბერს ბათუმი „ბათუმობა 2016“-ს მასპინძლობს, რისთვისაც ქალაქის ბიუჯეტიდან დაახლოებით 300 000 ლარი გამოიყო. პროგრამა რამდენიმე კონცერტს და სხვადასხვა კულტურულ ივენთს მოიცავს.
3 სექტემბერს ღონისძიება გაიმართება კულტურის სახლში, ხოლო 4 სექტემბერს ანბანის კოშკთან.
ბათუმის მერიაში აცხადებენ, რომ ქუჩები გაფორმდება ორიგინალურად. ბათუმობას დაესწრებიან სტუმრები დამეგობრებული ქალაქებიდან. დაგეგმილია სხვადასხვა გამოფენები და აქტივობები.
„კოლონადებთან იგეგმება სხვადასხვა კულტურული ღონისძიებები ბავშვებისთვის. ბათუმელებს ძალიან საინტერესო ბათუმობას ვპირდებით. ყვავილებით მოირთვება დუმბაძისა და აბაშიძის ქუჩები. ბათუმის ქუჩების გაფორმება ხვალიდან დაიწყება“, აცხადებენ ბათუმის მერიაში.
„ბათუმობის ფარგლებში ძალიან ბევრი ღონისძიება გაიმართება. ბათუმის კულტურის ცენტრში დაგეგმილია შეხვედრები, სადაც მონაწილეობენ თეატრისა და კინოს მსახიობები, ის ადამიანები, რომლებიც ასოცირდებიან ბათუმთან. მრავალი ფილმია გადაღებული ბათუმში, მაგალითად: „არაჩვეულებრივი გამოფენა“, „ფეოლა“, „მზიური“ და მსახიობები რომლებიც ამ ფილმებში მონაწილეობენ, იქნებიან მოწვეულები. დაგეგმილია გალა კონცერტი, ქართული ესტრადის ვარსკვლავებისა და სხვადასხვა კონკურსში გამარჯვებული მომღერლების მონაწილეობით. მემედ აბაშიძის გამზირზე წარმოდგენილი იქნება მრავალი ღონისძიება, მათ შორის, კულინარიული ფესტივალი და ფოტოგამოფენა. კოლონადებთან დაგეგმილია საბავშვო სტუდიების კონცერტები და ბევრი საინტერესო ღონისძიება“-განაცხადა პროექტის მუსიკალურმა ხელმძღვანელმა ლაშა ღლონტმა.
