ჩნდება კითხვის ნიშნები, ხომ არ აფარებს ვინმე ხელს სტურუას საქმეში სავარაუდო კანონდამრღვევს-ეს განცხადება სახალხო დამცველმა ჟურნალისტებთან სტურუას საქმის გამოძიების კომენტირებისას გააკეთა.
უჩა ნანუაშვილის თქმით, აუცილებელია უახლოეს დღეებში ყველა ღონისძიება გატარდეს ბრალდებულის დასაკავებლად.
„ჩნდება კითხვის ნიშნები, ხომ არ აფარებს ვინმე ხელს სავარაუდო დამრღვევს. აუცილებელია უახლოეს დღეებში ყველა ღონისძიება გატარდეს ამ პიროვნების დასაკავებლად. აქედან გამომდინარე, ველი დაუყოვნებლივ ასეთი ნაბიჯების გადადგმას საგამოძიებო ორგანოების მხრიდან. წინაამდეგ შემთხვევაში საზოგადოებაში კიდევ უფრო გაღრმავდება რწმენა, რომ ვიღაცა ხელს უწყობს ამ დანაშაულის დაფარვას და ჩაფარცხვას. ასეთი მოლოდინი საზოგადოებაში გაჩნდა იმის გამო, რომ არ ხდებოდა რეაგირება. სამწუხაროდ, დაგვიანებით, მაგრამ მაინც მოხდა რეაგირება და ბრალის წაყენება, მაგრამ ახლა შემდგომი ნაბიჯებია საჭირო საგამოძიებო ორგანოების მხრიდან, - განაცხადა ნანუაშვილმა. იმედს გამოვთქვამ, რომ სავარაუდო დამრღვევს არ დაუტოვებია საქართველოს საზღვრები. ეს იქნება ლაკმუსის ქაღალდი, თუ რამდენად ეფექტურად ჩატარდება გამოძიება. არა მხოლოდ ბრალის წაყენებაა მთავარი, არამედ კონკრეტული შედეგი უნდა დადგეს. ეს საქმე არის მნიშვნელოვანი და პრეცედენტული, რადგან ეს საქმე ავლენს სისტემის ხარვეზს. საუბარია იმაზე, რომ ნარკოპოლიტიკა იმ ფორმებით, რაც საქართველოში არსებობს, არის მიუღებელი, მკაცრი, არაჰუმანური და ხელისუფლებამ მთლიანად უნდა შეცვალოს ეს პოლიტიკა“, - განაცხადა უჩა ნანუაშვილმა.