საქართველოს შინაგან საქმეთა მინისტრ გიორგი მღებრიშვილის გერმანიის ფედერაციულ რესპუბლიკაში ვიზიტით ყოფნისას საქსონიის პოლიციის პრეზიდენტმა იურგენ გეორგიმ აღნიშნა, რომ ორი ქვეყნის სამართალდამცველების სისტემატურმა თანამშრომლობამ მნიშვნელოვანი შედეგი გამოიღო.
შეხვედრაზე საქსონიის ფედერალური მიწის შს მინისტრმა საქართველოს ევროპული და ევროატლანტიკური მისწრაფებებისადმი მხარდაჭერა კიდევ ერთხელ ხაზგასმით გამოხატა და ვიზალიბერალიზაციის ფორმატში სამომავლო, კიდევ უფრო მჭიდრო საპოლიციო თანამშრომლობის განვითარებაზე ისაუბრა. როგორც მარკუს ულბიგმა აღნიშნა, გერმანიაში კარგად იციან ის ფაქტი, რომ საქართველოში პოლიტიკური ან სხვა ნიშნით არავინ იდევნება. შესაბამისად, „თავშესაფრის“ მიღების მსურველებს არაკეთილსინდისიერი მიზნებით გერმანიაში დარჩენის ცრუ მოლოდინი არ უნდა ჰქონდეთ.
საქსონიის შს მინისტრის თქმით, გერმანული მხარე დადასტურებულ ინფორმაციას ფლობს, რომ გერმანიაში დანაშაულის ჩამდენი პირები საქართველოდან არ იმართებიან.
მხარეებმა განსაკუთრებით წარმატებულად შეაფასეს ქვეყნებს შორის არსებული თანამშრომლობა არალეგალურ მიგრაციასთან ბრძოლის კუთხით.
როგორც შეხვედრაზე აღინიშნა, საქართველოს შსს-ს მიერ გერმანიიდან შემოსული რეადმისიის მოთხოვნათა თითქმის 100 პროცენტი დაკმაყოფილდა.
საქართველოს შს მინისტრმა ხაზი გაუსვა ბოლო პერიოდის განმავლობაში საქართველოსა და გერმანიას შორის არსებულ მჭიდრო საპოლიციო თანამშრომლობას და მისი კიდევ უფრო გაღრმავების მნიშვნელობაზე ისაუბრა, მათ შორის, სამუშაო ჯგუფების შექმნისა და კონკრეტული გეგმების შემუშავების მიმართულებით. როგორც გიორგი მღებრიშვილმა აღნიშნა, ყველა ქვეყნის შინაგან საქმეთა მინისტრი ერთი და იმავე გამოწვევების წინაშე დგას. შესაბამისად, საერთო პრობლემების გამკლავება წარმატებული საპოლიციო თანამშრომლობითაა შესაძლებელი.
