თელავის რაიონის სოფელ ყარაჯალას იმამი ბეიცალ ორუჯოვი და მასთან ერთად კიდევ რვა პირი კახეთის პოლიციის დეპარტამენტის თელავის სამმართველოში არიან გადაყვანილები. როგორც კახეთის საინფორმაციო ცენტრს ყარაჯალადან აცნობეს, თელავის გასასვლელში, სოფელ ვარდისუბანთან რამდენიმე მამაკაცს შორის შელაპარაკება მოხდა, ადგილზე მისული პოლიციის თანამშრომლები კი ინციდენტის მონაწილეებს ჯერ ფიზიკურად გაუსწორდნენ, შემდეგ დააკავეს.
„ვარდისუბანთან ხის საამქროა, საიდანაც რამდენიმე კაცმა ფიცარი იყიდა, მაგრამ ცოტა გაუტანებიათ. ამის გამო ისევ მივიდნენ საამქროში, რატომ მოგვატყუეთო. ამაზე იკამათეს. მერე პოლიცია მოვიდა ორი მანქანით, მათ კიდევ სხვა ეკიპაჟები გამოიძახეს. 5-6 კაცი ცემეს და დააკავეს. ათი კაცი მაინც არის ამის მოწმე“, - აღნიშნა ყარაჯალაში მცხოვრებმა მამაკაცმა.
შს სამინისტროს ინფორმაციით, შელაპარაკება 6 ეთნიკურად აზერბაიჯანელსა და 3 ქართველს შორის მოხდა. მათივე განმარტებით, დაკავებული არცერთი მათგანი არ არის. სამინისტროში არ ადასტურებენ მოქალაქეების ცემის ფაქტს.
„მოქალაქეები პოლიციაში საქმის გარკვევის მიზნით გადაიყვანეს და დღესვე დატოვებენ პოლიციის განყოფილებას“, - განუცხადეს კახეთის საინფორმაციო ცენტრს შსს-ში.
